बेनी, । म्याग्दीको रघुगंगा गाउँपालिका–५ झिँमा समाजघर (सामुदायिक भवन) ठडिएको छ ।
स्थानीयबासीले चन्दा संकलन गरेर जुटाएको रकमबाट किनेको जग्गामा गण्डकी प्रदेशसभा सदस्य हरि भण्डारीको सिफारिसमा निर्वाचन क्षेत्र पूर्वाधार विकास कार्यक्रमको सहयोगमा भवन ठडिएको हो ।
झिँ समाजघर उपभोक्ता समितिका अध्यक्ष कृष्ण पुनले आर्थिक वर्ष २०७९÷८० मा प्रदेश सरकारको रु. २५ लाख बजेटबाट ८ मिटर चौडाई र १३ मिटर लम्बाई भएको एक तले जस्तापाटाले छाएको भवन निर्माण भएको जानकारी दिनुभयो ।
“केही वर्षपहिले रु. २५ लाखमा तीन रोपनी जग्गा किनेर राखेको थियौ,” उहाँले भन्नुभयो “गत वर्ष सांसद भण्डारीले सिफारिस गरेर प्रदेशबाट आएको रु. २३ लाख ७० हजार र रु. दुई लाख भन्दा बढीको श्रमदानमा निर्माण भएको भवनमा पलास्टर, फर्निचर, रंगरोगन, पानी, बिजुलीको काम बाँकी छ ।”
स्टोर र किचनका लागि बनाइएको यो भवन तत्काल अर्को भवन नबन्दासम्म सभाहलकै रुपमा प्रयोग गरिने भएको छ । भवनमा डेढ सय जना भन्दा बढी अटाउन सक्ने क्षमता छ । सभा, सम्मेलन, भेला, छेवार, किरिया, बिवाह जस्ता कार्यक्रम र भोज सञ्चालन गर्न भवन प्रयोग गर्ने योजना छ ।
सभाहलका लागि अर्को छुट्टै भवन बनाउन गाउँपालिका, प्रदेश र संघीय जनप्रतिनिधिलाई प्रस्ताव गरेको उपभोक्ता समितिका अध्यक्ष पुनले बताउनुभयो । ठडिएको भवनलाई पूर्णता दिन रु. दश लाख भन्दा बढी बजेट आवश्यक पर्छ ।
गण्डकी प्रदेशसभा सदस्य भण्डारीले झिँ समाजघरका उपभोक्ता समितिले तोकिएको बजेट अनुसार पुरै काम गरेकामा खुसी व्यक्त गर्नुभयो । भवनलाई पूर्णता दिन समन्वय र पहल गर्ने उहाँले बताउनुभयो ।
