![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
भकिम्लीमा तीन महिनादेखि सडक सम्पर्क बिच्छेद
हलेगौडा । म्याग्दीको बेनी नगरपालिका–३ भकिम्लीको हलेगौडा गाउँ पहिरोको उच्च जोखिममा परेको छ ।
हलेगौडा स्थित काठेपिपलबाट सुरु भएको पहिरो बस्तीको नजिकै पुगेपछि जोखिममा परेको हो । भिरालो पाखो चिरा–चिरा परेर गत असार अन्तिम सातादेखि सुरु भएको पहिरो खस्ने क्रम अझै नरोकिएको वडा सदस्य गेमप्रसाद घर्तीमगरले बताउनुभयो ।
‘‘करिब डेढ किलोमिटर दुरीको लम्बाई र एक किलोमिटर दुरीको चौडाइको पाखो छिया छिया भएको छ,’’ उहाले भन्नुभयो ‘‘गाउँको नजिकै आइपुगेको पहिरोले घरको पर्खाल चर्किन थालेपछि हलेगौडाका सात परिवार बिस्थापित भएका छन् ।’’
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
![](https://dhaulagirikhabar.com/wp-content/uploads/2020/10/Main-Bhikimly-Pahairo-10.jpg)
हलेगौडाका ३१ घर पहिरोको उच्च जोखिममा परेका छन्् । रनबहादुर घर्ती, नरबहादुर घर्ती, रनबहादुर रोका, तिलबहादुर घर्ती, खिममाया रोका, नरदेवी रोका, सोचेन्द्र रोका, गंगबहादुर रोका, कर्णबहादुर रोका र चन्द्रबहादुर रोकाको परिवार बिस्थापित भएका छन् ।
रात परेपछि छिमेकीकहाँ गएर सुत्ने गरेको बिस्थापित सोचिन्द्र रोकाले बताउनुभयो । ‘दिनमा दश÷पन्ध्र सेन्टिमिटरका दरले जमिन तल तल बगिरहेको छ,’’ उहाले भन्नुभयो ‘‘एउटै बारीको पाटा तल र माथि भएका छन् ।’’
नरबहादुर रोकाको कुखुरा फर्म भत्किएको छ । तीन जना कृषकको ३०० रोपनी सुन्तला बगैचा पहिरोमा बगेको छ । बेनी देखि दूधेखोला–हलेगौडा–डाडाखानी हुदै भकिम्ली जोड्ने १०० मिटर ढलान गरेको सहित डेढ किलोमिटर सडक पहिरोसँगै बगेको छ ।
![](https://dhaulagirikhabar.com/wp-content/uploads/2020/10/Main-Bhikimly-Pahairo-8.jpg)
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
७३५ घरधुरीको बसोबास रहेको भकिम्लीको सिंगो वडा तीन महिनादेखि सदरमुकाम बेनीसँग यातायात सम्पर्क बिच्छेद भएको स्थानीय होमबहादुर रोकाले बताउनुभयो । आवत जावतका साथै विकास आयोजनाका लागि निर्माण सामग्री ढुवानी र पशु तथा कृषि उपज निकासी गर्न सास्ति भएको छ ।
भकिम्ली जोड्ने ५ वटा मध्य हलेगौडाको सडक सबैभन्दा छोटो र सजिलो थियो । हाल चालू रहेको एउटा मात्रै थामडाडा–मरेक–छेपारे–मुसुङ–भकिम्ली सडकमा नियमित गाडी चल्दैन् । पहिले भकिम्लीबाट बेनी आउन तीस मिनेट समय लाग्थ्यो । सडक घुमाउरो भएकाले आवत जावतका लागि पैदलयात्रा गर्ने गरेको स्थानीय तिलाराम थापाले बताउनुभयो ।
मरेकको सडकमा ढुवानीका लागि ट्याक्टर मात्र मुस्किलले चल्छ । पहिलेको तुलनामा दोब्बर बढी ढुवानी खर्च लागेको डाडाखानीका धनबहादुर श्रीसले बताउनुभयो । घुमाउरो र जोखिमयुक्त भएकाले स्थानीयबासी यातायात सुबिधाबाट बञ्चित भएका छन् ।
हेलगौडाको पहिरोले भकिम्लीको समग्र बिकासलाई अबरोध गरेको वडा अध्यक्ष पदम पुन बताउनुहुन्छ । ‘‘यो पहिरोले हाम्रो बिकासको गतिलाई ब्रेक लगाएको छ,’’ उहाले भन्नुभयो ‘‘बस्तीलाई जोखिममा पारेर पहिरोमै फेरी सडक बनाउन सम्भव नभएकाले विकल्पको अध्ययन सुरु गरेका छौ ।’’
![](https://dhaulagirikhabar.com/wp-content/uploads/2020/10/Main-Bhikimly-Pahairo-5.jpg)
भिरालो पाखोमा खनिएको सडकको भल ब्यवस्थापन नभएका कारण हलेगौडामा नयाँ पहिरो सिर्जना भएको स्थानीयको भनाई छ । पहिरो खसेर मिसिने ढुधेखोलामा आउने बाढीले कोप्रे र दूधेखोलाको बस्तिलाई समेत जोखिम बनाएको छ ।
भकिम्लीलाई यातायात सञ्जालमा जोड्न बैकल्पिक सडकको पहिचानका साथै जोखिममा परेको हलेगौडाको बस्तीमा थप क्षति हुन नदिन तत्कालै संरक्षणको काम गर्नुपर्ने वडा अध्यक्ष पुन बताउछन् ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)