म्याग्दी । म्याग्दीको उत्तरी क्षेत्र हुदै हिमाली जिल्ला मुस्ताङ जोड्ने बेनी जोमसोम सडक १८ दिनपछि बिहीबार साँझबाट सञ्चालन भएको छ ।
म्याग्दीको अन्नपूर्ण–३ दानाको रुप्से, काभ्रे तथा मुस्ताङको सिमाना घोप्टेभिरमा खसेको पहिरोले सडक बगाएपछि भदौ २९ गतेदेखि ७६ किलोमिटर दुरीको बेनी–जोमसोम सडकमा सिधा आवत जावत बन्द भएको थियो ।
बेनी–जोमसोम–कोरला सडक आयोजनाका निर्माण कम्पनीका डोजर परिचालन गरेर पहिरो पन्छाउने, नयाँ ट्याक खोल्ने र डाइभर्सन बनाएर यातायात सञ्चालन गरिएको आयोजना प्रमुख अशोक तिवारीले जानकारी दिनुभयो । उहाँका अनुसार घाँसा नजिकैको थाप्लाङमा बाढीले अवरुद्ध सडक पनि केही बेरमा खुलाउने गरि डोजर परिचालन भएको छ ।
भिरमा चट्टान फुटाउनका लागि नेपाली सेनाको सहयोगमा बिस्फोटक पदार्थका समेत प्रयोग भएको थियो । सडक अवरुद्ध हुँदा मुस्ताङमा आवत जावतका साथै खाद्यान्न, निर्माण सामग्री ढुवानी र स्याउ बजार पठाउन रोकिएको थियो ।
सडक खुलेपछि सवारी साधनहरु गन्तब्यतर्फ लागेका आयोजनाका स्थानीय सुपरभाइजर इन्द्रसिंह शेरचनले बताउनुभयो । बिच बिचमा गाडी परिवर्तन गर्नुपर्ने समस्या हटेको उहाँले बताउनुभयो । यसअघि असार २६ गतेदेखि अवरुद्ध सडक भदौ ९ गते ४५ दिनपछि सञ्चालन भएको थियो ।
मुस्ताङबासीको जनजिवनलाई सहज बनाउन, विकास निर्माणका कामलाई गति दिन र करोडौ मूल्यका स्याउ समयमै बजार पु¥याउनका लागि बेनी–जोमसोम सडकमा नियमित सवारी सञ्चालन गराउन पहल गरिएको प्रतिनिधिसभा सदस्य प्रेमप्रसाद तुलाचनले बताउनुभयो ।
आयोजना, निर्माण कम्पनी, स्थानीय प्रशासन, सुरक्षा निकाय, पालिकाहरुसँग समन्वय गरेर सडक खुलाउन पहल गरिएको उहाँले बताउनुभयो ।
