बेनी, । म्याग्दीको रघुगंगा गाउँपालिका–५ झिँ र ६ पाखापानीका कृषकहरुलाई किविका बिरुवा वितरण गरिएको छ ।
नेपाल रेडक्रस सोसाइटी म्याग्दी शाखाले सञ्चालन गरेको सामुदायिक जिविकोपार्जन प्रर्वद्धन कार्यक्रम मार्फत ५९ घरधुरीलाई हेवर्ड जातका किविका बिरुवा निशूल्क वितरण गरिएको हो । रेडक्रस सोसाइटी म्याग्दीका सभापनि अमर बानियाले झिँका २१ र पाखापानीका ३८ घरधुरीलाई एक हजार २२ वटा किवीका बिरुवा वितरण गरिएको जानकारी दिनुभयो ।
झिँ, पाखापानी, कमनाथ, ठाडाखानी, रायखोर, कोटगाउँ, मुलपानीका कृषकलाई उपलब्ध जग्गा र मागको आधारमा प्रति घर कम्तिमा १५ वटा बिरुवा उपलब्ध गराइएको छ । प्राविधिकहरुको टोलीले गरेको माटो परिक्षणको प्रतिवेदन, सिफारिस र कृषकको मागको आधारमा बिरुवा वितरण गरिएको हो ।
“विपन्नलाई आयआर्जनसँग जोडेर जिवनस्तर सुधार गर्ने कार्यक्रमको उद्देश्य हो,” उहाँले भन्नुभयो “किवीका अलावा उच्च आम्दानी हुने दाँते ओखर, सुन्तला, टिम्मुरका बिरुवा वितरण, तरकारी खेतीमा पनि सघाएका छौ ।”
माटो, भूगोल र हावापानी उपयुक्त भएकाले किवी खेतीका लागि विरुवा उपलब्ध गराइएको हो । यसअघि रघुगंगा गाउँपालिकाको बेग, दग्नाम र चिमखोलामा तीन वर्ष आइरिस रेडक्रसको सहयोगमा सञ्चालन भएको कार्यक्रम यस वर्षदेखि झिँ र पाखापानीमा शुरु भएको हो ।
