मुना, । म्याग्दी क्षेत्र (ख) बाट निर्वाचित गण्डकी प्रदेशसभा सदस्य रेशमबहादुर जुग्जाली जनभेटघाट अभियान लिएर धवलागिरी गाउँपालिकाका विभिन्न वस्तीमा पुग्नुभएको छ ।
जुग्जालीले बुधबार धवलागिरी गाउँपालिकाको लुलाङ, लमसुङ, खोरीया, मुना, मुदी र मच्छिममा स्थानीयबासी र नेता कार्यकर्ताहरुलाई भेटघाट गरेर धन्यवाद ज्ञापन गर्नुभयो । साथै प्रदेश सरकारको सहयोगमा सञ्चालित योजनाहरुको अनुगमन गर्नुभएको थियो ।
समस्या, आवश्यकता संकलन तथा स्थानीय जनप्रतिनिधि र सरोकारवालासँग छलफलका लागि गाउँ आएको जुग्जालीले बताउनुभयो । पालिका, वडाका जनप्रतिनिधि र स्थानीयबासीहरुले त्यहाँको समस्या र आवश्यकताको बारेमा जानकारी गराउनुभएको थियो ।
केन्द्रिय राजनीतिमा नयाँ समिकरण बनेपछि प्रदेश सरकारबाट माओवादी बाहिरिएपछि पुर्व उद्योग, पर्यटन, वन तथा वातावरण मन्त्री समेत रहेका जुग्जालीले आफ्नो निर्वाचन क्षेत्रका मतदाता र सर्वसाधारणसँग भेटघाटका लागि गाउँ पुग्नुभएको हो ।
जुग्जालीको टोलीमा नेकपा माओवादी केन्द्रका गण्डकी प्रदेश सदस्य खुमनाथ सुवेदी, नेपाली काँग्रेसका म्याग्दी प्रदेश (ख) का सभापति टंकप्रसाद पुन, धवलागिरी गाउँपालिकाका उपाध्यक्ष रेशम पुन मगर सहभागी हुनुभएको थियो । जुग्जालीले यसअघि मालिका गाउँपालिकाको निस्कोट, रुम, ओखरबोट, महभिर, च्युरीबोटमा जनभेटघाट र अन्तरक्रिया गर्नुभएको थियो ।
