बेनी, । म्याग्दीको धवलागिरी गाउँपालिका–७ ताकममा आइतार नेकपा एमालेको मिसन ग्रासरुट अभियान सम्बन्धी कार्यक्रम सम्पन्न भएको छ ।
एमालेको दुई महिने मिसन ग्रासरुट अभियान अन्तरगत धवलागिरी गाउँपालिका कमिटिको आयोजनामा वैठक तथा मिसन ग्रासरुट र पार्टी सुदृढीकरण एवं सङ्गठन विस्तार अभियान–२०७९ को विषयमा अभिमुखीकरण गरिएको हो ।
कार्यक्रममा नेकपा एमालेका केन्द्रीय सदस्य चन्द्रमोहन गौचनले एमाले पार्टीको चुनौतीको रुपमा रहेको दक्षिणपन्थी अवसरवाद र साङ्गठनिक अराजकताको अन्त्यका लागि मिसन ग्रासरुट अभियान सञ्चालन गरिएको जानकारी दिनुभयो ।
गौचनले मिसन ग्रासरुट अभियानको माध्यमबाट नेता, कार्यकर्तालाई पार्टी र विभिन्न विषयहरुको बारेमा तल्लो तहसम्म पुगेर प्रशिक्षण दिएर प्रतिबद्ध बनाइने बताउनुभयो । उहाँले पार्टी प्रशिक्षणको माध्यमले अवसरवादमुक्त बनाउन ग्रासरुट अभियानको रुपमा सञ्चालन गरिएको भन्दै पार्टीको विधि र विधानभन्दा बाहिर गएर काम गर्नेलाई पहिलो चरणमा शिक्षा दिइने तथा नसुध्रिएको खण्डमा पार्टीमार्फत अन्य विकल्पहरु अपनाइने बताउनुभएको थियो ।
सोही कार्यक्रममा एमाले गण्डकी प्रदेश कमिटीका सचिवालय सदस्य हरिकृष्ण श्रेष्ठले सिट सङ्ख्याको हिसाबमा नेकपा एमाले अलिकति सानो भए पनि जनमतको हिसाबले देशको पहिलो पार्टी भएको बताउनुभयो ।
उहाँले ग्रासरुट अभियानमार्फत जनताको घरदैलोमा पुगेर एमालेले सरकारमा रहँदा गरेका राम्रा कामहरुको प्रचारप्रसार गरिने र सङ्गठन सुदृढीकरण तथा विस्तारलाई जोड दिइने जानकारी दिनुभयो । कार्यक्रममा एमाले गण्डकी प्रदेश सचिवालय सदस्य खुमबहादुर बानियाँ, पार्टी जिल्ला उपसचिव थमसरा पुन र सचिवालय सदस्य एवं प्रदेश (ख) समन्वय कमिटी संयोजक खरमाया बिटालुको विशेष उपस्थिति रहेको थियो ।
एमाले धवलागिरि गाउँपालिका कमिटीका कार्यवाहक अध्यक्ष रेशम छन्त्यालको अध्यक्षता र ताकमको वडा कमिटी सचिव तेजेन्द्रबहादुर थापाको सञ्चालनमा सम्पन्न कार्यक्रममा पालिका कमिटी उपाध्यक्ष राजाराम सुवेदीले स्वागत गर्नुभएको थियो । उक्त वैठकद्वारा दुई महिनाको अवधिमा पालिकाभित्र वडा र टोलमा पुगेर पार्टीको सङ्गठन सुदृढीकरण तथा विस्तारसम्बन्धी विषयमा आवश्यक कार्ययोजना निर्माण गरिएको छ । कार्यक्रममा पालिका कमिटीका पदाधिकारी, सदस्य, वडा कमिटी अध्यक्षहरु र अगुवा नेता तथा कार्यकताको उपस्थिति थियो ।
