बरंजा । मंगला गाउँपालिका–३ बरंजामा रहेको जनप्रिय आधारभूत विद्यालयका विद्यार्थीलाई म्याग्दी जेसीजले सोमबार स्विटर वितरण गरेको छ ।
विद्यालयको ३५ औ वार्षिकोत्सवको अवसरमा जेसीजको न्यानो माया कार्यक्रम अन्तरगत विपन्न परिवारका जेहेन्दार ३१ जना विद्यार्थीलाई स्विटर वितरण गरिएको हो । बेनीको रेडक्रस मार्गमा रहेको आचार्य बस्त्रालयका सञ्चालक माधव आचार्यले उपलब्ध गराउनु भएको स्विटर जेसीजले वितरण गरेको जनाइएको छ ।
विद्यालय व्यवस्थापन समितिका अध्यक्ष मिलन रोकाको अध्यक्षता, वडा अध्यक्ष याम रोकाको प्रमुख आतिथ्यतामा भएको कार्यक्रममा म्याग्दी जेसीजका शाखा अध्यक्ष सुमन बानियाले गाउँ केन्द्रित कार्यक्रमलाई प्राथमिकता दिने बताउनुभयो ।
जेसी सुनिता बेल्वासेको संयोजकत्वमा कार्यक्रम भएको थियो । म्याग्दी जेसीजको सन २०२३ का लागि चयन भएको कार्यसमितिको यो पहिलो कार्यक्रम हो । युवाहरुको नेतृत्व र व्यक्तित्व विकासमा त्रियाशिल म्याग्दी जेसीजले विद्यार्थीको खेलकुद तथा कला र संस्कृति संरक्षण एवम् प्रतिभा पहिचान, पर्यटन प्रर्वद्धनका विभिन्न कार्यक्रम गर्दै आएको छ ।
