बेनी, । म्याग्दी उद्योग वाणिज्य संघको २९ औ साधारणसभा शनिबार बेनीमा सम्पन्न भएको छ ।
साधारणसभाको उद्घाटन गर्दै नेपाल उद्योग वाणिज्य महासंघका बरिष्ठ उपाध्यक्ष चन्द्र ढकालले निजी क्षेत्र म्याग्दीको जलविद्युत र पर्यटन क्षेत्रमा लगानी भित्र्याउन इच्छुक रहेको बताउनुभयो । ढकालले निजी क्षेत्रको लगानी भित्र्याउन अगुवाई गर्ने प्रतिवद्धता जनाउनुभयो ।
‘मुस्ताङ र मुक्तिनाथको प्रवेशद्धारमा रहेका हिमालले म्याग्दीको पर्यटन क्षेत्रमा सम्भावना छ,’ उहाँले भन्नुभयो ‘यहाँका स्थानीय तह र उद्योगी व्यवसायी अग्रसर हुनुहोस । निजी क्षेत्रेको छाता संगठनको नेतृत्व भएको नाताले ठूलो लगानी भित्र्याउन महासंघले समन्वय गर्छ ।’
चन्द्रगिरि हिल्स केबुलकारका संस्थापक समेत रहेका ढकालले सातै प्रदेशमा केबुलकार परियोजनाको परिकल्पना गरिएको बताउनुभयो । निजी क्षेत्रले म्याग्दीमा केही जलविद्युत आयोजना निर्माण सकेका, केही निर्माणको क्रममा रहेको र कालीगण्डकीमा थप १५० मेगावाट क्षमताको जलविद्युत आयोजना निर्माणको तयारीमा रहेको ढकालले बताउनुभयो ।
बैंक तथा वित्तीय संस्थामा देखिएको तरलता अभावका कारण आर्थिक र व्यवसायिक क्षेत्रमा असर देखिन थालेको बताउनुभयो । ‘थला परेको अर्थतन्त्र र व्यवसायिक क्षेत्रलाई चलायमान बनाउन छरिएको पुँजीलाई एकिकृत गरेर उत्पादनशिल क्षेत्रमा परिचालन गर्न आवश्यक छ,’ ढकालले भन्नुभयो ‘बैकिङ क्षेत्र भन्दा बाहिर छरिएर रहेको पुँजीलाई एकिकृत र परिचालन हुने वातावरण वनाउन नीति निर्माण तहमा पहल गरेका छौ ।’
गैरआवासीय नेपाली र प्रवासीहरु मार्फत वैदेशिक पुँजी भित्र्याउन विद्यमान नीतिगत व्यवस्था र लगानीमैत्री वातावरण बनाउन तीनै तहका सरकार देखि समुदायले चासो दिनुपर्ने उपाध्यक्ष ढकालको भनाई थियो ।
कार्यक्रममा नेपाल उद्योग वाणिज्य महासंघका उपाध्यक्ष अञ्जन श्रेष्ठ, संविधानसभा सदस्य रेशमबहादुर बानिया, बेनी नगरपालिका प्रमुख सुरत केसी लगायतले मन्तब्य व्यक्त गर्नुभएको थियो ।
म्याग्दी उद्योग वाणिज्य संघका अध्यक्ष बेलबहादुर कटुवालले सडक, बेनी अस्पतालको भवन लगायत योजना निर्माणमा भएको ढिलासुस्तिले यहाँको आर्थिक, ब्यापारिक गतिबिधिमा पनि असर पुगेकोमा ध्यानाकर्षण गराउनुभएको थियो ।
महासचिव अमित बानियाले उद्योगी व्यवसायीहरुको सहजताका लागि राजस्व र व्यवसाय दर्ताका लागि सहजिकरण, बेनीमा सिसिटिभी क्यामेरा सञ्चालन, बेनी नगरपालिकासँग समन्वय गरेर व्यवसाय कर संकलन, पालिका स्तरका व्यवसायीहरुलाई तालिम उपलब्ध गराइएको बताउनुभयो ।
कोषाध्यक्ष सुवर्ण रिजालले आर्थिक प्रतिवेदन प्रस्तुत गर्दै संघले स्थापना गरेको व्यवसायिक हित कोषमा एक हजार ६१९ जना व्यवसायी आवद्ध भएका र गत आवका २६ जनालाई रु. दश लाख सहित हालसम्म २७ लाख ८५ हजार सहयोग गरिएको जानकारी दिनुभयो ।
कोरोनाले थला परेको आर्थिक गतिबिधि र व्यवसायलाई चलायमान गराउन आगामी पुष २८ देखि माघ ८ गतेसम्म सातौ म्याग्दी महोत्सव गर्न लागिएको संघले जनाएको छ ।
