म्याग्दीको बेनी नगरपालिका–९ को भूमेसिद्ध टिम्मुर सञ्जालमा आवद्ध कृषकहरुलाई बुधबार टिम्मुर टिप्ने र काँटछाँट गर्ने ४० थान औजार वितरण गरिएको छ ।
जर्मनीको गार्डेना कम्पनीले उत्पादन गरेको औजार लुपथान्सा एअरलाइन्सले इको हिमाल अस्ट्रिया मार्फत निशूल्क उपलब्ध गराएको हो । ईकोहिमाल अस्ट्रियाका अध्यक्ष प्रोफेसर कुर्ट, इकोहिमाल नेपालका कार्यकारी प्रमुख एक नारायण ढकाल र जिल्ला वन कार्यालय म्याग्दीका सहायक वन अधिकृत चन्द्रमणी सापकोटाले औजार वितरण गर्नुभएको थियो ।
वडा सदस्य झलक विश्वकर्मा, सारदा विक र भूमेसिद्ध टिम्मुर सञ्जालका अध्यक्ष सागर बानियालाई औजार हस्तान्तरण गरिएको थियो । संस्थाका अध्यक्ष कुर्ट लङगरले औजारले कृषकलाई टिम्मुर टिप्न सहज र टिम्मुर संरक्षणमा सहयोग पुग्ने बताउनुभयो ।
काडाधारी बोटमा फल्ने टिम्मुरको फल टिप्नका लागि रुखनै काटिदाँ बिरुवानै मासिने खतरा बढेपछि जर्मनीमा विकास भएको औजार भित्र्याएर कृषकलाई उपलब्ध गराएको ईकोहिमाल नेपालका कार्यकारी प्रमुख ढकालले बताउनुभयो ।
उहाँले म्याग्दीमा टिम्मुर खेती विस्तारका लागि अनुसन्धानका साथै अन्तराष्ट्रिय बजारमा पु¥याउन जर्मनीमा लगेर प्रयोगशालामा परिक्षण गर्ने व्यवस्था संस्थाले मिलाएको बताउनुभयो । कृषकहरुले प्रयोग गरेपछि आउने प्रतिक्रीयापछि थप औजार भित्र्याउने अथवा डिजाइन परिवर्तन गर्ने बताउनुभयो ।
ढकालका अनुसार भन्सार शूल्क सहित सो औजारहरु रु. दश लाख मूल्य बराबरका छन् । भुईबाटै टुप्पोमा फलेका दानाको झुप्पालाई काट्न मिल्ने सिकेचर, हाँगा काटछाटमा प्रयोग हुने सिकेर, करौटी लगायतका औजारहरु रहेका छन् । तीन प्रकारका सिकेचर उपलब्ध गराएका छन् ।
सहायक वन अधिकृत चन्द्रमणी सापकोटाले म्याग्दीमा व्यवसायिक टिम्मुर खेतीको विस्तारसँगै बजारीकरण र गुणस्तर सुधारमा जोड दिइएको बताउनुभयो । तोरीपानीमा टिम्मुर प्रसोधन गर्ने औजार खरिद गर्न वन डिभिजनले सहयोग गरेको उहाँले बताउनुभयो ।
भूमेसिद्ध टिम्मुर सञ्जालका अध्यक्ष सागर बानियाले ४० थान मध्य चार थान रघुगंगा गाउँपालिका–३ कलेजावाङका कृषकलाई दिने र बाँकी औजारहरु आलोपालो गरेर गाउँमै प्रयोग गरिने बताउनुभयो । टिम्मुरको गुणस्तर सुधारका लागि यसपाली पाकेपछि मात्रै मंसिरमा टिम्मुर टिप्न लागिएको बताउनुभयो । औजारको प्रयोग गरेर टिम्मुरको फल टिप्न र अनावश्यक हाँगा काटछाट गर्न पनि औजार प्रयोग गर्न कृषकहरुलाई अनुरोध गर्नुभयो । तोरीपानी, ढावा, धुपीबोट, ढोलथानका १०० जना भन्दा बढी कृषकहरुले व्यवसायिक टिम्मुर खेती गरेका छन् ।
मुखमा राख्दा रमरम गर्ने स्वाद पाइने टिम्मुर बेनी, पोखरा, काठमाडौ, नारायणघाट लगायत बजारका साथै जापान र कोरीयाबाट पनि माग आएको छ । टिम्मुरलाई दाल र चटनीमा मसलाको रुपमा प्रयोग गरिन्छ । रमरम गर्ने स्वाद पाइने, न्यानो बनाउने र बास्नादार टिम्मुर गुणस्तर अनुसार प्रतिपाथी दुई हजार पाँच सय देखि चार हजार रुपैयाँका दरले बिक्री हुने गरेको छ ।
