![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी, । आगामी मंसिर ४ गते हुन लागेको प्रतिनिधि र प्रदेशसभा सदस्य निर्वाचनलाई लक्षित गरेर म्याग्दीमा मतदाता शिक्षा अभियान सञ्चालन गर्ने तयारी भएको छ ।
जिल्ला निर्वाचन कार्यालयले स्थानीय तह मार्फत महिला स्वास्थ्य स्वमसेविकाहरुलाई मतदाता शिक्षाका लागि परिचालन गर्न लागिएको जनाएको छ । म्याग्दीमा ४६१ जना स्वमसेविकाहरुलाई कात्तिक १७ गतेभित्र नियुक्ति गरेर १८ गतेदेखि मतदाता शिक्षा अभियानमा परिचालन गरिने जिल्ला निर्वाचन अधिकारी भिमप्रसाद घिमिरेले जानकारी दिनुभयो ।
“निर्वाचन आयोगले बनाएको निर्देशिका अनुसार महिला स्वास्थ्य स्वमसेविकाहरुलाई मतदाता शिक्षा अभियानमा परिचालन गर्न लागिएको हो,” उहाँले भन्नुभयो “स्थानीय तहले खटाउने स्वमसेवकहरुका लागि आवश्यक मतदाता शिक्षा सामग्री पठाइसकेका छौ ।”
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
स्वयंसेवकले ब्रोसरका माध्यमबाट मतदान गर्ने, मतपत्र मतपेटिकामा खसाल्ने, मतदान केन्द्रसम्म पुग्ने लगायत विषयमा सिकाउने छन् । मत वदर हुने दर घटाउनका लागि निर्वाचन शिक्षा कार्यक्रम सञ्चालन गर्न लागिएको हो । गत वैशाखमा भएको स्थानीय तह निर्वाचनमा ५४ हजार ६७८ मत खसेकोमा ९२.४३ प्रतिशत मत सदर भएको थियो ।
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
वि.स. २०७४ को प्रतिनिधि र प्रदेशसभा सदस्य निर्वाचनमा ४७ हजार ४४९ मत खसेकोमा समानुपातीको प्रतिनिधीसभातर्फ चार हजार ६८६ (९.८७ प्रतिशत) र प्रदेशसभातर्फ छ हजार ७७५ (१४.२७ प्रतिशत) मत बदर भएको थियो। प्रत्यक्षतर्फ प्रतिनिधिसभामा ४.८१ प्रतिशत र दुई वटै प्रदेशसभामा एक हजार ४८३ ३.१२ प्रतिशत मत बदर भएको निर्वाचन कार्यालयको अभिलेख छ ।
६ वटा स्थानीय तह रहेको म्याग्दीमा ८२ वटा मतदान स्थल र ११९ वटा मतदान केन्द्र छन् । प्रतिनिधीसभामा १ र प्रदेशसभामा २ वटा निर्वाचन क्षेत्र रहेको म्याग्दीमा निर्वाचित हुने तीन पदका लागि १९ जना उमेद्वार प्रतिस्पर्धामा छन् । बेनी नगरपालिका, रघुगंगा र अन्नपूर्ण गाउँपालिकालाई समेटेको ४९ मतदान स्थलमा ६८ वटा केन्द्र रहेको प्रदेशसभा क्षेत्र (क) मा ४८ हजार ४७२ मतदाता छन् ।
मंगला, मालिका र धवलागिरी गाउँपालिका समावेश ३३ स्थलमा ५१ केन्द्र रहेको प्रदेशसभा क्षेत्र (ख) मा ३७ हजार ६४८ जना मतदाता छन् । जिल्ला निर्वाचन कार्यालयका सूचना अधिकारी चित्रनाथ शर्माले प्रदेशसभाको २ वटा र प्रतिनिधिसभाको एक वटा निर्वाचन क्षेत्रको समानुपातिक मतपत्र लगायत निर्वाचन सामग्री आइसकेको बताउनुभयो ।
निर्वाचन सामग्री व्यवस्थापन, मतदान केन्द्रमा खटिने जनशक्तिको खटनपटन र मतदाता शिक्षामा केन्द्रित भएको निर्वाचन कार्यालयले जनाएको छ । १२० मतदान अधिकृत, १२० सहायक मतदान अधिकृत, ५९३ सहायक कर्मचारी, १२० जना सहयोगी कर्मचारी मतदान केन्द्रमा खटाइने निर्वाचन अधिकृत घिमिरेले बताउनुभयो ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)