बेनी, । मंसिर ४ गते हुने प्रतिनिधि र प्रदेशसभा सदस्य निर्वाचनका लागि म्याग्दीमा सत्तासाझेदार पाँचदलीय गठबन्धन, नेकपा एमाले लगायत दल तथा स्वतन्त्र उमेद्वारहरुले मनोनयन दर्ता गराएका छन् । तीन सिटका लागि १५ जनाको मनोनयन दर्ता भएको मुख्य निर्वाचन अधिकृतको कार्यालयले जनाएको छ ।
बेनी स्थित मुख्य निर्वाचन अधिकृतको कार्यालयमा बिहान १० देखि साँझ ५ बजेसम्म मनोनयन दर्ता गराएका हुन् । प्रतिनिधिसभा सदस्यतर्फ नेकपा एमालेका हरिकृष्ण श्रेष्ठ, नेपाली काँग्रेसका खमबहादुर गर्बुजा (खम्बिर), राप्रपाका जगतप्रसाद गौचन, नेपाल स्वतन्त्र पार्टीका हरि केसीले मनोनयन दर्ता गर्नुभएको छ ।
प्रदेशसभा क्षेत्र (क)मा नेकपा एमालेका देबेन्द्रबहादुर केसी, गठबन्धनबाट नेकपा माओवादी केन्द्रका हरि भण्डारी, राप्रपाका प्रविण शाही लगायतले मनोनयन दर्ता गराउनुभएको छ । प्रदेशसभा क्षेत्र (ख)मा एमालेका यामबहादुर गर्बुजा, गठबन्धनबाट माओवादीका रेशम जुग्जाली (सुविन), राप्रपाकी मिठु थापा लगायतले मनोनयन दर्ता गराउनुभएको छ ।
यसैगरी मंगोल नेशनल अर्गनाइजेशनबाट प्रतिनिधिसभामा ओमराज मगर, क्षेत्र (क) मा दिपक पुन, (ख) मा डेकबहादुर पुन (डिके)ले मनोनयन दर्ता गर्नुभएको छ । प्रदेशसभाको क्षेत्र (क) मा बेनपा १ रत्नेचौरका नेत्र महत र अन्नपूर्ण ६ का खिलबहादुर बरुवालले स्वतन्त्र मनोनयन दर्ता गराउनुभएको छ । महत नेपाली काँग्रेसका नेता हुनुहुन्छ ।
स्वतन्त्र पार्टीबाट प्रदेशसभा क्षेत्र (क) मा नविन जिसी र (ख) मा देबेन्द्र फगामीले मनोनयन दर्ता गराउनुभएको छ । म्याग्दीमा क्रियाशिल नेकपा एकिकृत समाजवादी र राष्ट्रिय जनमोर्चाले सत्ता साझेदार दल काँग्रेस र माओवादीका उमेद्वारलाई सघाउने नीति अनुसार मनोनयन दर्ता नगरेको जनाएका छन् ।
मनोनयन दर्ताका लागि मुख्य निर्वाचन अधिकृतको कार्यालयले फरक फरक दललाई समय तोकेको थियो । तोकिएको समयमा प्रस्तावक, समर्थक र नेताहरुको साथमा पुगेका उमेद्वारले मनोनयन दर्ता गराएका थिए । गठबन्धनका उमेद्वारहरु मनोनयन दर्ताका लागि सँगै मुख्य निर्वाचन अधिकृतको कार्यालयमा गएका थिए ।
