बेनी,। बेनी नगरपालिका–८ कालीपुलमा रहेको बालमन्दिर आधारभूत विद्यालयमा शुक्रबार रु. दुई लाखको अक्षयकोष स्थापना भएको छ ।
दशै विशेष खेलकुद सप्ताहको अवसरमा भएको विविध खेलकुद, सांस्कृतिक तथा प्रथम त्रैमासिक परिक्षाको नतिजा प्रकाशन, पुरस्कार वितरण र शुभकामना आदानप्रदान कार्यक्रममा कोषका लागि रकम हस्तान्तरण गरिएको हो ।
विद्यालय व्यवस्थापन समितिका अध्यक्ष मनबहादुर चर्मकारले छोरा प्रेम चर्माकार (हाल अमेरिका)को तर्फबाटबाट अक्षयकोष निर्माणका लागि रु. दुई लाखको चेक प्रअ सुरेन्द्र केसीलाई हस्तान्तरण गर्नुभएको थियो ।
वडा अध्यक्ष उत्तम कर्माचार्यको प्रमुख आतिथ्यतामा भएको कार्यक्रममा विभिन्न विधामा उत्कृष्ट हुने विद्यार्थीहरुलाई पुरस्कार र प्रमाणपत्र वितरण गरिएको थियो ।
