बेनी, म्याग्दीको मालिका गाउँपालिका–२ रुम तामिङमा मंगलबार बिहान पहिरो जाँदा एउटा परिवारका सबै सदस्यले ज्यान गुमाएका छन् ।
तामिङका ३७ वर्षीय घामबहादुर बिकका श्रीमति, दुई छोरा र एक छोरीको पहिरोमा पुरिएर ज्यान गएको जिल्ला प्रहरी कार्यालय म्याग्दीले जनाएको छ । डिएसपी तिलक भारतीले दूई जनाको बिहानै र तीन जनाको दिउँसो शव भेटिएको जानकारी दिनुभयो ।
‘घामबहादुर, उनकी श्रीमति ३२ वर्षीया राममाया बिक र ८ वर्षीया छोरी रोजीको शव स्थानीयबासी र प्रहरीको टोलीले पहिरोमा भेटाएको हो,’ उनले भने ‘घामबहादुरका छोराहरु वर्ष १३ का राजन र १५ वर्षीय नविन बिहान मृत भेटिएका थिए ।’
मृतक सबै एकै परिवारका भएका स्थानीयबासी गिता बुढाथोकीले बताइन् । ‘बिहान करिब ५ बजे सुतिरहेको अवस्थामा पाखोबाट आएको पहिरोले घामबहादुरको घर पुरेको थियो,’ उनले भनिन् । पहिरोमा भाग्ने क्रममा घाइते भएका गोठे बिक र उनकी श्रीमति गोरी बिक घाइते भएका छन् ।
स्वास्थ्य अवस्था सामान्य रहेका उनिहरुको रुम स्वास्थ्य चौकीमा उपचार गरिएको छ । पहिरोमा घामबहादुरको दुई वटा खच्चर मरेका छन् । गोठमा जिवितै रहेको एक वटा भैसीलाई गाउँलेले अन्यत्र सारिदिएका छन् ।
घटनास्थल तामिङ गाउँ रुमको फेदीमा पर्छ । निरन्तरको बर्षातका कारण सडक अवरुद्ध भएकाले दरवाङबाट प्रहरी र उद्दारकर्ताको टोली घटनास्थल पुग्न समस्या भएको थियो । बर्षातसँगैको पहिरोले संरचनामा क्षति पुगेकाले विद्युत आपुर्ति बन्द भएको छ ।
