बेनी, । म्याग्दीको अन्नपूर्ण गाउँपालिकाले आर्थिक वर्ष २०७८÷७९ मा करिब १६ किलोमिटर सडकको नयाँ मार्ग खोलेको छ ।
सडक निर्माण र स्तरोन्नतिमा जोड दिएको अन्नपूर्ण गाउँपालिकाको विभिन्न ठाउँमा एक वर्षको अवधिमा १५.९४ किलोमिटर सडकको मार्ग खोलिएको पूर्वाधार शाखाले जनाएको छ ।
गाउँपालिकाका ईञ्जिनियर ईश्वरबहादुर भण्डारीले ३२० मिटर सडकमा ग्राभेल, ५४२.५३ मिटर सोलिङ, २३४ मिटर सडकमा आरसिसी ढलान र कजवे निर्माण, ६ वटा कल्भर्ट, ५७.४ मिटर नाली निर्माण भएको जानकारी दिनुभयो ।
खिवाङ–घराम्दी र राम्चे–घोडेपानी जोड्ने सडकको मार्ग निर्माण तथा महभिर–हिस्तान–राम्चे सडक स्तरोन्नतिलाई प्राथमिकता दिइएको थियो । घोडेपानीबाट फुलबारी र राम्चेबाट आहालडाडाबाट सडक निर्माण थालिएको छ । खिवाङ तर्फबाट घराम्दी जोड्ने सडकको मार्ग खोल्ने उद्देश्यले सडक निर्माण भएको छ ।
दुई हजार ८७४.८ घनमिटर ग्यावीयन पर्खाल र १३२.५३ घनमिटर रिटेनिंग पर्खाल निर्माण भएको छ । वडा नम्बर ४ र ५ मा २÷२ वटा र १ मा एक वटा झोलुङ्ग पुल निर्माण भएको छ ।
गाउँपालिकाको कार्यक्रमबाट एक हजार २२४.०५ मिटर नयाँ पदमार्ग निर्माण र दुई हजार ८९६.७५ मिटर पदमार्ग स्तरोन्नति भएको छ । प्रधानमन्त्री रोजगार कार्यक्रम मार्फत दुई हजार ५०० मिटर पदमार्ग निर्माण भएको छ ।
यस वर्ष १९ घरमा नयाँ धारा जडान, ११ हजार ४४७.६ मिटर खानेपानी लाइन विस्तार, ३३ हजार लिटर क्षमताका टंकी निर्माण, ढल निकासका लागि ७२६ मिटर पाइपलाइन विस्तार र १२ वटा च्याम्बर बनाइएको छ ।
सामुदायिक तथा विद्यालय, मन्दिर, सभाहल र शौचालय २४ वटा निर्माण र १३ वटा मर्मत भएको छ । सरकारी अनुदानमा मनसुनजन्य विपद् प्रभावितको ८ वटा घर निर्माण भएको छ ।
दुई वटा प्रवेशद्धार र एक वटा पार्क निर्माण भएको छ । पूर्वाधार सम्बन्धी १६४ वटा योजना रहेकोमा १६१ वटा सम्पन्न भएका गाउँपालिकाका सूचना अधिकारी हरिकृष्ण आचार्यले बताउनुभयो ।
उहाँका अनुसार निर्माण व्यवसायीले काम नगरेपछि रु. पचास लाख बिनियोजन भएको खिवाङ खानेपानी आयोजनाको ठेक्का रद्द गरिएको छ । ३ वटा योजनाको ठेक्का सम्झौता गरिएको थियो । लेखापाल प्रेम पराजुलीले गत आर्थिक वर्षमा चालुतर्फ ७७.९६ र पुजिगततर्फ ७८.०६ प्रतिशत प्रगति भएको जानकारी दिनुभयो ।
