![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी, म्याग्दी जिल्लामा पछिल्लो एक वर्षको अवधिमा ५७० उद्योग र व्यवसायिक फर्म थप भएका छन् ।
घरेलु तथा साना उद्योग कार्यालय म्याग्दीमा नयाँ ३३८ उद्योग र २३२ वटा वाणिज्य फर्म दर्ता भएका हुन् । २०७८ साउन देखि २०७९ असार सम्म दर्ता, नविकरण भएका उद्योग तथा फर्मबाट रु. १६ लाख ८१ हजार ७५० राजस्व संकलन भएको कार्यालयका प्रमुख पोषनाथ शर्माले बताउनुभयो ।
“पहिलेदेखिनै सञ्चालन भएका उद्योग तथा फर्महरु कानुनी दायारामा आउनुका साथै उद्यम ब्यवसायतर्फको आकर्षणका कारणले दर्ता संख्या बढेको हो,” उहाँले भन्नुभयो “नयाँ फर्म तथा उद्योग दर्ता गर्नेमा धेरैजसो युवा छन् ।”
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
दर्ता र नविकरणका क्रममा उद्योगबाट रु. नौ लाख ३०५, वाणिज्यतर्फ रु. सात लाख ६९ हजार २४५ र अन्य शिर्षकमा रु. १२ हजार २०० राजस्व संकलन भएको हो । अघिल्लो आर्थिक वर्ष २०७७÷७८ मा ७६२ वटा उद्योग र ब्यवसायिक फर्म दर्ता भएका थिए ।
यसैगरी रु. २६ लाख आठ हजार १२३ राजस्व संकलन भएको थियो । नयाँ दर्ता भएका ३३८ मध्य २०९ वटा कृषि तथा वन पैदावारमा आधारित छन् । यसअघि दर्ता भएका २३३ उद्योग र ३०९ वटा वाणिज्ण फर्म नविकरण भएका छन् । जिल्लामा हाल उद्योग दुई हजार ६६१ र व्यवसायिक फर्म एक हजार ५२८ वटा रहेका छन् । उद्योगहरुमा एक हजार ५२८ जनाले रोजगारी पाएका छन् ।
गत आर्थिक वर्षमा कुल रु. एक करोड १३ लाख बजेट मध्य रु. ९३ लाख ६० हजार ११५ बजेट खर्च भएको छ । १७२ जनालाई उद्यमशिलता विकास सम्बन्धी तालिम प्रदान गरेको छ । बेनपा–९ तोरीपानीमा २२, धवलागिरी–७ ताकममा २७, मालिका–५ देविस्थानमा ३४, रघुगंगा–६ पाखापानीमा २७, अन्नपूर्ण–४ नारच्याङमा २७ र मंगला –२ बाबियाचौरमा ३५ जनालाई तालिम प्रदान गरिएको कार्यालयका कम्प्युटर सहायक सन्तोष ढुङ्गानाले बताउनुभयो ।
१३ जनालाई मेशिन उपकरण खरिद गर्न रु. १५ लाख ९५ हजार अनुदान उपलब्ध गराएको छ । ७ वटा पर्यटकीय पूर्वाधार योजना निर्माणका लागि रु. बीस लाख बिनियोजन भएकोमा ६ वटा योजना सम्पन्न र रु. १६ लाख ७९ हजार खर्च भएको छ । तीन ठाउँमा व्यवसाय दर्ता शिविर सञ्चालन र २० पटकमा २२२ वटा फर्मको अनुगमन गरेको कार्यालयले जनाएको छ ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)