बेनी, म्याग्दीको बेनी नगरपालिका–१ रत्नेचौरमा पहिरोले नहर भत्किएपछि धान रोपाई रोकिएको छ ।
तेईस साले सिचाई आयोजनाको नहर भत्किएपछि रत्नेचौरमा मुख्य खाद्यबाली धान रोपाई प्रभावित भएको हो । शुक्रबार र शनिबारको बर्षातपछि जमिन भासिएर आयोजनाको मुहान नजिकै र पन्थेको कटेरो भन्ने ठाउँमा १३० मिटर नहर भत्किएको छ ।
रत्नेचौर तेइससाले सिचाई आयोजनाको उपभोक्ता समितिका अध्यक्ष कृष्णबहादुर बोगटीले पानी नभएपछि कृषकहरु रोपाई रोकेर नहर मर्मत र पुननिर्माणमा जुटेको बताउनुभयो । “रोपाई शुरु गर्न थालिएको थियो । पहिरोले नहर बगाएपछि पानी नभएर रोकिएको छ,” उहाँले भन्नुभयो “मुहान मर्मत र २०० एमएमको चार वटा पाइप राखेर एउटा पहिरो कटायौ फेरी नयाँ पहिरोले नहर भासिएपछि समस्या भयो ।”
दैनिक ८० देखि ९० जनाका दरले श्रमदान गरेर सिचाई आयोजना मर्मत र पुननिर्माणमा जुटेका छन् । नहर भत्किएको र भासिएको ठाउँबाट पानी तार्न थप ३५ मिटर २०० एमएमको २ वटा एचडी पाइप राख्नुपर्ने अध्यक्ष बोगटीले बताउनुभयो । पाइप खरिद गर्ने आर्थिक स्रोतको अभाव भएको उहाँले बताउनुभयो ।
पानी अभावका कारण रत्नेचौर, भुवाने, नाङ्लीवारीको खेतमा रोपाई प्रभावित भएको हो । बेनी नगरपालिकाका प्रमुख सुरत केसीले क्षति पुगेको नहरको अध्ययनका लागि आइतबार प्राबिधिकलाई निरिक्षणका लागि पठाएको बताउनुभयो ।
“भत्किएको र भासिएको ठाउँमा तत्काललाई पाईप राखेर पानी तारेर खेत रोप्ने व्यवस्था मिलाउन अध्ययनका लागि प्राविधिकलाई पठाएका छौ,” उहाँले भन्नुभयो “सिचाई नहर पुननिर्माण र मर्मतका लागि आगामी आर्थिक वर्षका लागि बजेट बिनियोजन गरेका छौ ।”
वि.स. २०२३ सालमा निर्माण भएको आयोजनाको नहर २०७४ मा पुननिर्माण गरि पक्की बनाइएको थियो । ढोडेनी खोलाको बागलुङ र म्याग्दीको सिमानामा पर्ने ठुलोखोला भन्ने ठाउँमा यो आयोजनाको मुहान छ । तीन किलोमिटर नहर बनाएर रत्नेचौरमा पानी ल्याएर सिचाई गरिदै आएको छ ।
