बेनी, । बेनी नगरपालिका–७ मा चौतारी पोखरी संरक्षण अभियान थालिएको छ ।
वडाको विभिन्न ठाउँमा रहेका पुराना चौतारी र पोखरीको पहिचान गरेर मर्मत गरी संरक्षण थालिएको छ । वडा अध्यक्ष रमेशकुमार श्रेष्ठले जिर्ण बनेका चौतारी र पोखरी मर्मत थालिएको जानकारी दिनुभयो ।
“हाम्रो वडामा १८ वटा चौतारी र एक वटा पोखरी पहिचान गरेका छौ,” उहाँले भन्नुभयो “धार्मिक, जैविक विबिधताको संरक्षण र विश्रामको सुविधाका लागि जिर्ण चौतारीको पुननिर्माण गर्न थालेका हौ ।”
चालू आर्थिक वर्षमा बिनियोजन भएको रु. एक लख २७ हजार बजेटबाट मालपोत कार्यालय अगाडीको चौतारी मर्मत थालिएको छ । आगामी आर्थिक वर्षमा थप बजेटको ब्यवस्थापन गरेर वडाका सवै चौतारी मर्मत र संरक्षण गरिने वडा अध्यक्ष श्रेष्ठले बताउनुभयो ।
फुर्सदको समयमा वडा अध्यक्ष आफै चौतारी मर्मत र संरक्षणको काममा श्रमदान गर्नुभएको छ । बुधबार दिउँसो श्रेष्ठले मालापोत अगाडीको मर्मतको क्रममा रहेको चौतारीमा निर्माण भएको पर्खालमा पानी हालेर क्युरीङ गर्दै गरेको अवस्थामा भेटिनुभएको थियो ।
चौतारी बनाएका दाताहरुसँग समन्वय गरेर मर्मत थालिएको उपभोक्ता समितिका सदस्य रहमद खानले बताउनुभयो । चौतारी र पोखरीको भत्कीएका पर्खाल पुननिर्माण गरेर मर्मत गरिने उहाँले बताउनुभयो ।
बटुवा, भरियाहरुको विश्रामका लागि चौतारी बनाउने र बर पिपलका रुख रोप्ने चलन पछिल्लो समय सडक विस्तार तथा समाजिक परिवर्तनसँगै हराउदै गएको छ । परम्परागत समाजमा धर्म र पुण्यका लागि चौतारा बनाउने चलन थियो । त्यसबेला बनाएका पोखरीहरु अहिले झाडीमा परिणत भएका छन् ।
फेरिएको परिवेशमा चौतारीलाई विश्रामस्थल, प्रतिक्षालय र धार्मिक स्थलको रुपमा विकास गराउने योजना रहेको वडा अध्यक्ष श्रेष्ठले बताउनुभयो । चौतारीसँगै पुजा गर्ने ठाउँ बनाएमा मानिसहरुले फोहोर नगर्ने र सरसफाई कायम गर्न सकिने उहाँले बताउनुभयो ।
