बेनी,। गिभ पावर संस्थाले म्याग्दीका १५ वटा बस्ती, स्वास्थ्य, शैक्षिक संस्था र सिचाई आयोजनामा सौर्य उर्जा जडान गरेको छ ।
अमेरिकाबाट आएका संस्थाका प्रतिनिधीहरुले आफै श्रमदान गरेर सौर्य उर्जा जडान गरेका हुन् । केन्द्रिय प्रशारण लाइनको विद्यूत सुविधा नपुगेको र लघुजलविद्युत परियोजना निर्माण गर्न सम्भव नभएका दुर्गम बस्तीका साथै विद्यालय र शैक्षिक संस्थामा विद्युत आपुर्तिको वैकल्पिक व्यवस्थाका लागि सोलार जडान गरेका हुन् ।
यसै हप्ता मंगला गाउँपालिका–३ बान्द्रेमा म्याग्दी नदीको पानी तानेर सिचाई गर्न पाँच किलोवाट क्षमताको सोलार जडान गरेका संस्थाका प्रतिनिधिहरुले यसअघि मालिका गाउँपालिका–५ देविस्थान र रघुगंगा गाउँपालिका–६ को पाखापानी स्वास्थ्य चौकीमा ७.३७ किलोवाट क्षमताको सोलार जडान गरेका थिए ।
बान्द्रेका सन्तोष गिरीले सौर्य उर्जा जडान गरेर म्याग्दी नदीको पानी ११५ मिटर माथि रहेको नहरबाट १३ घरधुरीको २५० रोपनी जमिनमा बाह्ै महिना सिचाई गर्ने सुविधा भएको बताउनुभयो ।
“बस्ती मुनीको म्याग्दी नदीको पानी खेर गएपनि सुख्खा याममा सिचाई अभावमा खेतीबाली लगाउन, सिचाई गर्न र ब्याड राख्न समस्या हुने गरेको थियो,” उहाँले भन्नुभयो “सोलार बाट लिफ्ट सिचाई भएपछि बाह्ै महिना खेती गर्न सकिने भएको छ ।”
संस्थाका प्रतिनिधी र प्राबिधिकहरु सहित २६ जनाको टोलीले सोलार जडान र नदी किनारमा इनार बनाउन १२ दिन श्रमदान गरेका थिए । उनिहरुले मंगला माविमा कृषि प्राबिधिक विषय अध्ययन गर्ने विद्यार्थीहरुलाई हस्तकला सम्बन्धी तालिम सम्बन्धी दिएका थिए ।
सन २०२१ को डिसेम्बर महिनायता बागलुङको ताराखोला स्वास्थ्य चौकी, धादिङको चौकी भञ्ज्याङमा सोलार मिल, पर्वतको चित्रेको स्वास्थ्य चौकीमा सौर्य उर्जा र सोलार मिल, मोदी गाउँपालिकाको लेरपार स्वास्थ्य चौकीमा सौर्य उर्जा गरेका छन् ।
स्वास्थ्य चौकीमा वैकल्पिक विद्युत आपुर्तिको व्यवस्था भएपछि फ्रिज, डिपफ्रिज, एक्सरे, कम्प्युटर, प्रिन्टर, रकसन मेसिन, बेवी वार्मर, वामर लगायतका उपकरण आवश्यक परेको जुनसुकै समयमा प्रयोग गर्न सकिने भएको छ । बिरामीको उपचार, औषधी भण्डारण र सेवा विस्तारमा सहज भएको स्वास्थ्यकर्मीहरुले बताएका छन् ।
म्याग्दीको धवलागिरी गाउँपालिका वडा नम्बर ४ बगर र चेचुङमा सौर्य उर्जाबाट विद्युतीकरण गरेका थिए । अन्नपूर्ण गाउँपालिकाको देउराली आधारभूत, काफलडाँडा आधारभूत, आदर्श मावि, टिकोट मावि, सर्वोदय मावि, मुक्तिमार्ग मावि, खिवाङ आधारभूत, नांगीको सामुदायिक अस्पताल, राम्चे स्वास्थ्य चौकी र टिकोट सामुदायिक स्वास्थ्य इकाईमा पनि सौर्य उर्जा जडान गरेका सो संस्थामा आवद्ध सामाजिक कार्यकर्ता चित्र तिलिजा पुनले बताउनुभयो ।
