बेनी । म्याग्दीको रघुगंगा गाउँपालिका–७ चिमखोला र ८ कुइनेमंगलेका दुर्गम बस्तीहरुमा नेपाल टेलिकमको मोवाइल सेवा विस्तार भएको छ ।
रघुगंगा गाउँपालिका–७ चिमखोलाको पुस्तिवाङ डाडामा अस्थाई विटिएस टावर जडान गरेपछि भौगोलिक रुपमा विकट र दुर्गम क्षेत्रमा पर्ने दुई वटा वडामा मोवाइल फोन सेवा विस्तार भएको हो ।
मोवाईल फोनका लागि अग्ला डाँडा र रुखमा चढेर नेटवर्क खोज्नुपर्ने बाध्यता हटेको छ । पुस्तिबाङ डाँडामा अस्थायी रुपमा विद्युतको पोलमा बिटियस जडान गरेर सेवा सुचारु गरिएको नेपाल टेलिकम म्याग्दीका प्रमुख दामोदर सिमखडाले जानकारी दिनुभयो ।
‘‘तत्कालको लागि विजुलीको पोलमा उपकरण जडान गरेका छाँै, टावर निर्माणको लागि ठेक्का लगाइ सकिएको छ, फाउण्डेसनको काम पनि सकिएको छ, छिट्टै स्थायी संरचनाबाटै सेवा सुचारु हुन्छ’’– कार्यालय प्रमुख सिमखडाले भन्नुभयो । समुन्द्री सतहदेखि २ हजार ६ सय मिटर उचाइमा रहेको पुस्तिबाङ डाँडामा टेलिकमको २५ मिटर अग्लो टावर निर्माण गर्ने योजना रहेको छ ।
तत्कालको लागि टुजी र थ्रिजी मार्फत भ्वाइस र डाटा एकसाथ सञ्चालनमा आएको र पक्की टावर निर्माण भएपछि अत्याधुनिक प्रविधिको चौथो पुस्ताको फोरजी मोवाईल सेवा सञ्चालनमा आउने रघुगंगा गाउँपालिका–७ चिमखोलाका वडा अध्यक्ष थक बहादुर पाईजा (रिम)ले जानकारी दिनुभयो । उहाँका अनुसार, टावरका महत्वपूर्ण उपकरण राख्नका लागि गाउँपालिका मार्फत टावर परिसरमा भवन समेत निर्माण भैसकेको छ ।
टावर बनेपछि चिमखोलाको जस्लाबाङ, पात्लेखेत, गौडामाुनी, नगलडाँडा, कुइनेमंगलेको मंगलेखानी, घ्यासीखर्क, दुवाडी, ढाँड, पात्लेखर्क, चौरखानी लगायतका दुर्गम बस्तीहरुमा मोवाइल फोनको सहज पहुँच पुगेको छ ।
दुर्गम बस्तीहरुमा मोवाइल फोनको लागि नेटवर्क खोज्दै अग्डा डाँडा र रुखमा चढ्नुपर्ने बाध्यता टेलिकमको सेवा विस्तारपछि हटेको रितुङ मावि कुइनेमंगलेका शिक्षक याम घर्तिमिरेले बताउनुभयो । ‘‘सञ्चार सेवा नहुँदा निकै कठिनाई झेल्दै आउनुपरेको थियो, अब अधिकाँश बस्तीका नागरिकले घरबाटै मोवाईल फोनको प्रयोग गर्न पाउने भएका छन्’’–उहाँले भन्नुभयो ।
