बेनी, मुस्ताङको थासाङ गाउँपालिका–२ सानोसरेमा भएको तारा एयरको जहाज दुर्घटनामा वेपत्ता भएका २१ जनाको शव भेटिएको छ ।
घटनास्थलबाट फिस्टेल र कैलाश एयरको हेलिकप्टरले कोवाङमा ल्याएका १० वटा शव नेपाली सेनाको हेलिकप्टर मार्फत सोमबार अपराहन्न काठमाडौ पठाइएको र एक जनाको खोजी जारी रहेको जिल्ला प्रशासन कार्यालय मुस्ताङले जनाएको छ ।
घटनास्थलमा वेपत्ताको खोजीलाई जारी राख्दै कोवाङ ल्याएका शव सेनाको हेलिकप्टरबाट काठमाडौ पठाइएको मुस्ताङ प्रशासनका प्रशासकीय अधिकृत देवेन्द्रराज पाण्डेले बताउनुभयो । भिरबाट संकलन गरेर डाडामा राखिएको ११ वटा शव पानी परेको र कुहिरो लागेकाले हेलिकप्टर जान नसकेपछि कोवाङ ल्याउन नसकिएको उहाँले बताउनुभयो ।
चालक दलका तीन जना सदस्य र १९ जना यात्रु लिएर आइतबार बिहान ९ः५५ बजे पोखराबाट जोमसोमका लागि उडेको तारा एयरको ९ एनएईटी विमान विहान १०ः०७ बजे जोमसोम विमानस्थलको टावरबाट सम्पर्क विच्छेद भएको थियो । खराब मौसमका कारण जोमसोम जान नसकेपछि कोवाङ माथिको आकाशबाट पोखरा फर्कने क्रममा मानापाथी हिमालको फेदीको पहाडमा ठोक्कीएर जहाज दुर्घटना भएको बताइएको छ ।
घटनास्थलमा पुगेर फर्किएका इन्द्रसिंह शेरचनले सुरक्षाकर्मीहरुले डोरीको सहायताले भिरमा अड्किएका शव संकलन गरेका बताउनुभयो । भेटिएका शव सनाखत गर्न बाँकी छ । समुन्द्रि सतहदेखि चार हजार मिटर भन्दा बढी उचाइमा रहेको घटनास्थलमा छिनछिनमा कुहिरो लाग्ने र पानी पर्ने गरिरहेको छ । करिब एक सय जना नेपाली सेना, शसस्त्र प्रहरी, नेपाल प्रहरी, शेर्पा र स्थानीयबासी उद्धारमा परिचालन भएका छन् ।
नेपाली सेना, फिस्टेल र कैलाश एयरको एक÷एक वटा हेलिकप्टर उद्धारमा परिचालन गरिएको छ । थासाङ गाउँपालिकाको केन्द्र कोवाङ देखि न्याउरीकोट हुदै चार घण्टा हिडेपछि पुगिने मानापाथी हिमालको फेदीमा रहेको पहाडमा जहाज ठोक्कीएर टुक्राटुक्रा परेको अवस्थामा सोमबार बिहान यार्सागुम्बा संकलन गर्न गएकाहरुले भेटाएका थियो ।
