मुस्ताङ । शनिबार बिहानदेखि हराएको तारा एयरको जहाज खोज्न प्रतिकुल मौसमका कारण समस्या भएको छ ।
जहाज हराएको शंका गरिएको थासाङ गाउँपालिकाको लेते माथिको डाडाँ र घाँसाको जंगलमा केन्द्रित गरेर खोजी गरिएपनि दिउँसो १ बजेसम्म भेटिएको छैन् । जोमसोमबाट गएको फिस्टेल एयरको हेलिकप्टर खराब मौसमका कारण फर्किएको जिल्ला प्रशासन कार्यालयका प्रशासकीय अधिकृत देवेन्द्रराज पाण्डेले बताउनुभयो ।
“११ बजे गएको हेलिकप्टर खराब मौसमका कारण शंका गरिएको ठाउँमा छिर्न नसकेर फर्कियो,” उहाँले भन्नुभयो “सो क्षेत्रमा भएका चौरी र भेडा गोठालालाई सम्पर्क गर्नुका साथै पुन हेलिकप्टर पठाउने प्रयास गरिरहेका छौ ।”
मुस्ताङका प्रमुख जिल्ला अधिकारी नेत्रप्रसाद शर्मा, थासाङ गाउँपालिकाका अध्यक्ष प्रदिप गौचन लगायत सुरक्षा अधिकारी र जनप्रतिनिधीहरु लेतेबाट हराएको जहाज खोजिका लागि सम्पर्क र समन्वय गरिरहनुभएको छ ।
लेते र आसपासको क्षेत्रमा बिहानै देखि बाक्लो कुहिरो लागेको छ । बिहान पानी परेपनि दिउँसो रोकिएको छ । तर कुहिरो नहटेकाले स्थल र हवाई मार्गबाट जहाज खोज्न गरिएको प्रयासले सार्थकता पाउन नसकेको प्रशासकीय अधिकृत पाण्डेले बताउनुभयो । सो क्षेत्रमा घना जंगल, हिमाल र अप्ठ्यारो पहाड छ ।
पोखराबाट बिहान ९ः५५ बजे जोमसोमका लागि उडेको तारा एयरको ९ एनएईटी विमान विहान १०ः०७ बजे जोमसोम विमानस्थलको टावरबाट सम्पर्क विच्छेद भएको थियो । स्थानीयबासीहरुले कोवाङ माथिको आकाशबाट जहाज जोमसोम नगई पोखरातर्फ फर्किएको बताएका छन् ।
पोखरा विमानस्थलबाट जहाज उडाउनुअघि म्याग्दीको अन्नपूर्ण गाउँपालिका–३ दानाका इन्द्रसिंह शेरचनलाई मौसमको अवस्थाका बारेमा जानकारी मागिएको थियो । “बिमानस्थललाई कुहिरो लागेकाले जहाड उडाउन ठिक नहुने सुझाव दिएको थिए,” उहाँले भन्नुभयो । हराएको जहाजमा चालक दलका तीन जना र ९ जना यात्रु थिए ।
