बेनी, म्याग्दीको बेनीमा शनिबार सम्पन्न निशूल्क मुटुरोग उपचार शिविरबाट एक हजार पाँच सय जना लाभान्वित भएका छन् ।
काठमाडौको सेभ द हार्ट, म्याग्दीको ओमकुमारी शान्ति कोष, म्याग्दी प्रवासी नेपाली संघ (मोना) कतार र इशा फाउण्डेशनले बेनी अस्पतालमा आयोजना गरेको शिविर दुई दिनसम्म सञ्चालन भएको थियो ।
शिविरका संयोजक नेपाल पत्रकार महासंघ म्याग्दीका उपाध्यक्ष हरिकृष्ण गौतमले शिविरमा म्याग्दी, बागलुङ, पर्वत, मुस्ताङ जिल्लाका एक हजार ५०५ जनाले सेवा लिएका जानकारी दिनुभयो । ८६३ जनाको मुटुको इसिजी, ६०० जनाको इको गरिएको थियो । शल्यक्रिया गर्नुपर्ने ४९ जना बिरामी पहिचान भएका छन् । ४१ जनाको तत्कालै शल्यक्रिया गर्नुपर्ने चिकित्सकले सुझाएका छन् ।
४ जना बच्चा र अन्य १६ जनालाई सेभ द हार्टले काठमाडौमा निशूल्क शल्यक्रियाका लागि सिफारिस गरिएको आयोजकले जनाएका छन् । बरिष्ठ मुटुरोग विशेषज्ञ डाक्टर अनिल भट्टराई नेतृत्वमा काठमाडौबाट आएको ४० जना चिकित्कस र बेनी अस्पतालका चिकित्सक तथा स्वास्थ्यकर्मीहरुले सेवा दिनुभएको थियो ।
स्वास्थ्य परिक्षण र परामर्शका साथै निशूल्क औषधी वितरण सम्बन्धी सेवा पनि दिइएको थियो । शिविरको समापनका क्रममा चिकित्सक भट्टराईले बालबालिकाहरुमा पनि मुटुरोगको समस्या देखिन थालेकाले सचेत रहनुपर्ने बताउनुभयो ।
सेभ द हार्टले देशव्यापी रुपमा शिविर संचालन गर्दै आएको बताउनुभयो । म्याग्दी सहित २३ वटा जिल्लामा विभिन्न समयमा आयोजना गरिएका ९५ वटा शिविर हाल सम्म करिव ९६ हजार मुटुरोगीको परिक्षण गरिएको डा. भट्टराईले बताउनुभयो । उहाँका अनुसार शिविरमा हाल सम्म करिव १३ सय विरामीको ओपन हार्ट सर्जरी गरिएको छ भने बाँकी विरामीहरु निरन्तर सम्पर्कमा रहेर मुटु जाँच गराईरहेका छन ।
शिविरका संयोजक गौतमले हालैमात्र आफ्नो सानो छोराको मुटु सम्वन्धी रोगको डा. भट्टराईकै टिमले सफल उपचार गरेकोमा धन्यबाद प्रकट गर्दै गौतमले जिल्लामा रहेका थुप्रै मुटुरोगीहरुको सहजताका लागि सेभ द हार्टको टिमलाई अनुरोध गरेर बेनीमा शिविरको आयोजना गरिएको बताउनुभयो ।
शिविरको सहआयोजक ओमकुमारी शान्ति कोषका अध्यक्ष राजेश शाक्यले वि.स. २०७१ सालमा स्थापना भएको कोषले हाल सम्म २४९ जना बिरामीहरुको उपचारमा सघाएको जानकारी दिनुभयो । रु. १ करोड ३ लाखको अक्षयकोष रहेको कोषले आफ्नो व्याज र अभियानबाट हाल सम्म रु. २ करोड, ५३ लाख, १९ हजार १२९ बिरामीको उपचार तथा विपतको समयमा सहयोग गरेको शाक्यले बताउनुभयो ।
