बेनी। म्याग्दीको रघुगंगा गाउँपालिकाको अध्यक्षको उमेद्वार बन्न नेकपा माओवादी केन्द्रका चार जनाले दावी गरेका छन् ।
आगामी वैशाख ३० गते हुने स्थानीय तह निर्वाचनमा नेकपा (माओवादी केन्द्र) बाट गाउँपालिका अध्यक्ष पदको उम्मेदवारका लागि दावी गरेका चारै जनाको नाम सिफारिस गरिएको हो ।
पार्टीको गाउँपालिका कमिटीको बैठकमा गाउँपालिका अध्यक्ष पदको उम्मेदवार बन्न बिश्व सेन मल्ल, रिम कटुवाल, हरि भण्डारी र सुविन शेरपुञ्जाले आकांक्षा राख्नुभएको थियो । माओवादी केन्द्रको म्याग्दी–काठमाण्डौ सम्पर्क कमिटीको सल्लाहकार समेत रहनुभएकी महिला नेतृ मल्ल माओवादी शसस्त्र जनयुद्धमा पुर्णकालिन रुपमा होमिनुभएको थियो ।
रघुगंगा गाउँपालिका कमिटीको इन्चार्ज समेत रहनुभएका कटुवाल माओवादी केन्द्रबाटै २०७४ को स्थानीय तह निर्वाचनमा रघुगंगा –२ भगवतीको वडा अध्यक्षमा निर्वाचित हुनुभएको थियो ।
अघिल्लो स्थानीय तह निर्वाचनमा गाउँपालिका उपाध्यक्ष पदमा उम्मेदवार बन्नुभएका भण्डारी गाउँपालिका कमिटीको अध्यक्ष र मेकानिकल इन्जीनियर समेत रहनुभएका शेरपुञ्जा जिल्ला समन्वय समितिको सदस्य हुनुहुन्छ ।
शेरपुञ्जाले दग्नाम–दरमिजा बिचमा रहेको अजिंगर भिरको सडक निर्माणमा कार्यक्षेत्रमा खटिएर नेतृत्व समेत गर्नुभएको थियो । चारै जना आकांक्षीहरुले कार्यकर्ता र शुभेच्छुकहरुको भावना अनुसार सहमतीमै उम्मेदवारको टुंगो लगाउने प्रतिबद्धता जनाउनुभएको छ ।
गाउँपालिका अध्यक्षका प्रत्यासीहरुले माओवादीकै अगुवाईमा व्यवस्था परिवर्तन भएको र माओवादीकै एजेण्डामा स्थापित संघीय व्यवस्था मार्फत जनतालाई विकास र शुसासनको अनुभुति दिलाउने प्रतिबद्धता सहित जनताको घरदैलोमा चुनाबी अभियान लिएर जाने बताएका छन् । माओवादी केन्द्रले रघुगंगाका पाँच वटा वडाका वडा अध्यक्षका उम्मेदवारहरुको समेत टुंगो लगाइसकेको छ ।
