बेनी, । म्याग्दीमा करिब २९ हजार जनालाई टाइफाइड रोग विरुद्धको खोप लगाइने भएको छ ।
स्वास्थ्य कार्यालय म्याग्दीले शुक्रबारदेखि शुरु हुने टाइफाइड विरुद्धको खोप अभियानको सबै तयारी भएको जनाएको छ । म्याग्दीमा १५ महिना देखि १५ वर्ष उमेर समुहका २८ हजार ७१८ जनालाई टाइफाइड रोग विरुद्धको खोप लगाउन लागिएको कार्यालयका निमित्त प्रमुख एकनारायण लम्सालले बताउनुभयो ।
“धवलागिरी, मालिका र मंगला गाउँपालिकामा पुगिसकेको खोप बेनी नगरपालिका, रघुगंगा र अन्नपूर्ण गाउँपालिकामा बिहिबार साँझसम्म पुगिसक्छ,” उहाँले भन्नुभयो “देशभर बैशाख १९ गतेसम्म अभियान सञ्चालन गर्ने योजना भएपनि म्याग्दीमा बैशाख २ गतेभित्रै सक्ने कार्यतालिका बनाएका छौ ।”
२३० वटा विद्यालय र स्वास्थ्य संस्थामा खोप केन्द्र स्थापना गरिएको छ । विद्यालयमा खोप लगाउन छुटेकालाई स्वास्थ्य संस्थामा लगाइनेछ । २३० जना स्वास्थ्यकर्मी, ४६० स्वमसेवक र ५७ जना सुपरीवेक्षक परिचालन गरिने स्वास्थ्य कार्यालय म्याग्दीका पव्लिक हेल्थ नर्स दुर्गा शर्माले बताउनुभयो ।
“अधिकांशलाई विद्यालयमै खोप लगाउने योजना छ,” उहाँले भन्नुभयो “विद्यालय नआउने बालबालिका खोपबाट बञ्चित हुने अवस्था आउन नदिन सचेत छौ ।” खोप अभियानमा परिचालन हुने स्वास्थ्यकर्मी, स्वमसेविका र महिला शिक्षकलाई छ चरणमा तालिम प्रदान गरिएको छ । विद्यालय र समुदाय स्तरमा खोपको बारेमा जानकारी गराउन सन्देशमुलक कार्यक्रम गरिएको छ ।
नेपालमा पहिलो पटक टाइफाइड रोग विरुद्धको खोप लगाउन लागिएको हो । अभियान सकिएपछि नियमित खोपमा टाइफाइडलाई समावेश गर्न लागिएको छ । पानी र खानेकुराबाट टाइफाइड रोगको संक्रमण हुनुमा तेस्रो स्थानमा रहेको छ । नेपालमा हरेक वर्ष चार लाख ५० हजार जनामा टाइफाइड रोगको संक्रमण देखिन्छ ।
टाइफाइडको संक्रमणका कारण अस्पतालमा भर्ना हुने विरामीहरुमध्य चौथो स्थानमा पर्छन् ।
टाइफाइड भएमा पेट तथा टाउको दुख्ने, अचानक ज्वरो आउनु, बान्ता हुनु, अत्याधिक पसिना आउनु र टाउको चिसो महशुष हुने र कब्जियत हुनु र कमजोरी महसुष हुने जस्ता लक्षण देखा पर्ने गर्दछन् ।
टाइफाइड शरीरमा संक्रमणको कारण हुन्छ । यसर बिस्तारै कलेजोमा नोक्सान पु¥याउँछ र पुरै शरीरलाई असर गर्छ । फोहोर एवं दुषित पानीको सेवन वा नुहाएपछि, खाना बनाएपछि, फल एवं सब्जी धोएपछि साथै टाइफाइटग्रस्त व्यक्तिसँगको संगतले अर्को व्यक्तिमा यो रोग सर्ने गर्दछ ।
यसैगरी बिहिबार म्याग्दीमा विश्व स्वास्थ्य दिवस मनाइएको छ । दिवसको अवसरमा स्वास्थ्य कार्यालयका सूचना अधिकारी गणेश सुवेदीले जलवायु परिवर्तनले स्वास्थ्य क्षेत्रमा पारेको असर र न्युनीकरणका उपाय सम्बन्धी प्रस्तुतिकरण गर्नुभएको छ ।
