बेनी, । म्याग्दीको बेनी नगरपालिकाका ६ वटा वडालाई समेटेर बाख्राको व्यवसायिक उत्पादन केन्द्र (ब्लक) कार्यक्रम शुरु भएको छ ।
प्रधानमन्त्री कृषि आधुनिकिकरण परियोजना अन्तरगत भेटेरीनरी अस्पताल तथा पशु सेवा विज्ञ केन्द्र म्याग्दीले बेनी नगरपालिकाको १ देखि ६ नम्बर वडामा बाख्रा ब्लक शुरु गरेको हो ।
केन्द्रका नायव पशु सेवा प्राविधिक गणेश रिजालले व्यावसायिक बाख्रापालन विस्तार, मासुको उत्पादन बृद्धी, गुणस्तर सुधार र बजारीकरणमा सघाउने उद्देश्यले ब्लक कार्यक्रम सुरु भएको बताउनुभयो ।
“छनौट भएका वडाका कृषकहरुलाई समेटेर जिल्ला व्यवसायिक बाख्रापालक संघसँग सम्झौता गरी कार्यान्वयन थालिएको छ,” उहाँले भन्नुभयो “नयाँ ब्लक कार्यक्रमका लागि चालु आर्थिक बर्षमा रु. ३५ लाख बजेट बिनियोजन भएको छ ।”
छनौट भएका वडाका कृषक समूह, संस्था र सहकारीबाट प्रस्ताव मागिएको थियो । कार्यक्रम मार्फत कृषकहरुलाई बाख्राको खोर निर्माण, मासु पसल सुधार, घाँस काट्ने यन्त्र उपकरण, नश्ल सुधारका लागि बोका र औषधी वितरण गरिने भएको छ । औषधी निशूल्क, निर्माणमा ८५ र उपकरण खरिदमा ५० प्रतिशत अनुदान पाउनेछन् ।
४३ जना कृषकहरु ब्लकमा आवद्ध भएका संघका अध्यक्ष कृष्ण मल्लले बताउनुभयो । “अहिले हामीसँग तीन हजार तीन सय बाख्रा छन्,” उहाँले भन्नुभयो “कार्यक्रम मार्फत बाख्राको संख्या पाँच हजार भन्दा बढी पु¥याउने लक्ष्य छ ।”
म्याग्दीलाई मासुमा आत्मनिर्भर बनाउने र नश्ल सुधारका लागि आवश्यक उन्नत जातका बोका उत्पादन गर्ने लक्ष्य रहेको अध्यक्ष मल्लले बताउनुभयो । प्रधानमन्त्री कृषि आधुनिकीकरण परियोजना मार्फत वि.स. २०७६ देखि म्याग्दीमा बंगुर जोन कार्यक्रम सञ्चालन भएको छ ।
