बेनी । म्याग्दीको बेनी नगरपालिका–१ मा सोमवार ‘रत्नेचौर धार्मिक महोत्सव’ सम्पन्न भएको छ ।
परम वैदिक सनातन धार्मिक आश्रममा अवस्थित श्रीलक्ष्मी हरी मन्दिरमा फागुन २३ गतेदेखि महोत्सव शुरु भएको थियो । रत्नेचौर क्षेत्रमा रहेको धार्मिक महत्वलाई उजागर तथा प्रचार प्रसार र लक्ष्मीहरी मन्दिरको चौतर्फि विकासका लागि महोत्सव आयोजना गरिएको हो ।
महोत्सवमा रु. ३१ लाख सत्तरी हजार १०३ सहयोग संकलन भएको आयोजक समितिका उपाध्यक्ष चिरञ्जिवी बोगटीले बताउनुभयो । संकलन भएको रकमलाई यस क्षेत्रको धार्मिक पर्यटन पुर्वाधार निर्माणमा परिचालन गरिने उहाँले बताउनुभयो ।
लक्ष्मीहरी मन्दिरको २५ औं रजत जयन्ती तथा संस्थापकचार्य जगतगुरु अनन्त श्री विभूषित श्रीपराङ्कुशाचार्य यतिराज जीयर स्वामीजी महाराजको नाक्षत्र शताब्दीको अवसरमा हिमालय बाबाजीको तत्वावधानमा महोत्सव सञ्चालन भएको हो ।
भौगोलिक रुपमा रमणीय र मुक्तिनाथ प्रवेशद्धारको रुपमा रहेको रत्नेचौरको धार्मिक महिमालाई उजागर गर्न महोत्सव सहयोगी बनेको मुल आयोजक समितिका अध्यक्ष नेत्रबहादुर महतले बताउनुभयो ।
