बाबियाचौर । म्याग्दीको मंगला गाउँपालिकामा शुक्रबार नेकपा माओवादी केन्द्रको भातृ संगठन अनेमसंघ क्रान्तिकारी र नेपाल दलित मुक्ति मोर्चा गठन भएको छ ।
पालिकाको केन्द्र बाबियाचौरमा भएको संयुक्त प्रथम सम्मेलनले मनसुवी सापकोटाको अध्यक्षतामा अनेमसंघ क्रान्तिकारीको ३५ सदस्यीय र यामबहादुर विकको अध्यक्षतामा दलित मुक्ति मोर्चाको ४५ सदस्यीय कमिटि चयन गरेको हो ।
सम्मेलनको उद्घाटन गर्दै दलित मुक्ति मोर्चाका गण्डकी प्रदेश इञ्चार्ज टेकबहादुर बिकले माओवादीले उठाएको समावेशी, समानुपातिक व्यवस्था र विभेद अन्त्यको मुद्दा संबिधानमा सम्बोधन भएको र त्यसवाट दलित, जनजाति समुदाय र महिला लाभान्वित हुन थालेका बताउनुभयो ।
माओवादी केन्द्रका गण्डकी प्रदेश सदस्य चन्द्रप्रसाद बुढाथोकी, ज्योति लामिछाने, मनमाया चोचाङ्गी, वाइसीएलका प्रदेश सहसंयोजक पुनम खड्का, माओवादीका पालिका अध्यक्ष यामबहादुर रोका, दलित मुक्ति मोर्चाका जिल्ला इञ्चार्ज पदम किसान र जिल्ला संयोजक पृथीलाल विकले माओवादीको एजेण्डा अनुसार लागू भएको संघीय ब्यवस्थाको व्यवहारिक कार्यान्वयन गरि जनतालाई सेवा, सुविधा, विकास र सम्बृद्धिको अनुभव गराउन आगामी चुनावमा माओवादीलाई जिताउनुपर्ने बताउनुभयो ।
यामबहादुर बिकको अध्यक्षता, सारदा पाण्डेको सञ्चालन र ओममाया किसानको स्वागत मन्तब्यमा सम्मेलन सम्पन्न भएको थियो ।
