बेनी । म्याग्दीको धवलागिरी गाउँपालिका–४ नाउराको कोपिलाघाटमा झोलुङ्गे र वडा नम्बर २ को आवासखोलामा ट्रस पुल निर्माण भएको छ ।
धवलागिरी गाउँपालिकाले आवास खोलामा ३२ मिटर लामा ट्रस र नाउराको कोपिलाघाट स्थित म्याग्दी नदीमा ६७ मिटर लामो झोलुङ्गे पुल निर्माण गरेको हो । स्वाप कार्यक्रम मार्फत गैरसरकारी संस्था मिलन म्याग्दीको प्राबिधिक सहयोगमा पुल निर्माण भएको गाउँपालिकाका प्राबिधिक दिलिप थापाले जानकारी दिनुभयो ।
रु. ४० लाख ९४ हजार ४०५ को लागतमा निर्माण भएको कोपिलाघाटको झोलुङ्गे पुलबाट नाउरा र चेचुङका ३९ घरधुरी लाभान्वित भएका छन् । चेचुङका बासिन्दालाई नाउरा आवत जावत गर्न खिवाङ हुदै चार घण्टाको घुमाउरो बाटो हिड्नुपर्ने समस्या हटेको छ । उपभोक्ता समितिका अध्यक्ष रिम रोकाले एक घण्टामै नाउरा देखि चेचुङ पुग्न सकिने बताउनुभयो ।
यसैगरी आवासखोलामा रु. ३२ लाख ४१ हजार ८५९ को लागतमा निर्माण भएको ट्रस पुलबाट खोरियाका करिब एक सय घरधुरी लाभान्वित भएका छन् । आवासखोला पुलको मंगलबार र कोपिलाघाट पुलको बुधबार उद्घाटन र सार्वजनिक सुनुवाई गरिएको प्राबिधिक थापाले बताउनुभयो । आवासखोला पुलको वडा अध्यक्ष गमप्रसाद बिकले उद्घाटन गर्नुभएको थियो ।
पुल निर्माण भएपछि बर्खायाममा जोखिम मोलेर आवत जावत गर्नुपर्ने बाध्यता हटेको छ । पुल निर्माणका लागि टिबिएसयुको स्वाप कार्यक्रमले लठ्ठा र बुल्डअपग्रिप उपलब्ध गराएको थियो । गाउँपालिकाले स्टिल डेग खरिद र ढुवानी गरेको हो ।
धवलागिरी गाउँपालिकाले गत बर्ष शुरु गरेको सात वटा मध्य हालसम्म तीन वटा निर्माण सकिएका छन् । यसअघि वडा नम्बर ६ मराङको अस्कारे खोलामा रु. तीस लाख पचास हजारको लागतमा ३५ मिटर लामो ट्रस प्रबिधिको पुल निर्माण भएको थियो ।
सो पुलबाट धवलागिरीको मल्कवाङ, मराङ, आरबाङ, हाङबाङ, औसीबाङ, भेडिखाल्टा र रघुगंगाको कुइनेका सात सय घरधुरी लाभान्वित भएका उपभोक्ता समितिका अध्यक्ष जित गर्बुजाले बताउनुभयो ।
