धौलागिरि खबर

बेगखोलामा मोटरेबल पुल निर्माण शुरु

Hariyali Groups Pvt Ltd

बेगखोला। राष्ट्रिय गौरवको कालीगण्डकी कोरीडोर, बेनी–जोमसोम–कोरला सडक योजना अन्तरगत म्याग्दीको रघुगंगा गाउँपालिका–१ बेगखोलामा मोटर चल्ने पक्कि पुल निर्माण शुरु भएको छ ।

सडक बिभागको पुल महाशाखाले ७० मिटर लामो डबल स्पाम भएको पुल निर्माणका लागि बि.स. २०७८ असार २९ गते बिओकेआई÷हिमालयन जेभीसँग भ्याट सहित रु. आठ करोड ३० लाख ६८ लाख ४७३ मा ठेक्का सम्झौता गरेको थियो ।

बिभागको पश्चिम सेक्टर कार्यालयका इञ्जिनियर आशिक रिजालले ठेकेदारले निर्माण सामग्री जुटाएर पुल निर्माणका लागि प्रारम्भिक चरणको काम शुरु गरेको जानकारी दिनुभयो । “११ मिटर चौडाईको हुने पुलको डिजाइन एण्ड बिल्ड (निर्माण ब्यवसायीले आफै डिजाईन र निर्माण गर्ने) मोडलमा ठेक्का सम्झौता भएको हो,” उहाँले भन्नुभयो “बि.स. २०८० चैत २५ गतेभित्र पुल निर्माण सम्पन्न गर्ने लक्ष्य छ ।”

Rara Auto Mobiels

बि.स. २०७३ भदौ १७ गतेको बाढीले बेगखोलामा एक जना मानिस, ११ वटा घर, बेलिब्रिज र झोलुङ्गे पुल बगाएपछि बर्खायाममा बाढी आउँदा यातायात आवत जावत बन्द हुने र जोखिमपूर्ण यात्रा गर्नुपर्ने बाध्यता थियो । पाँच बर्षअघि बगाएको बेलिब्रिजको बिकल्पमा पक्कि पुल निर्माण हुन लागेको हो ।

Chadani auto head

पक्कि पुलसँगै गण्डकी प्रदेश सरकारको पूर्बाधार बिकास कार्यालय म्याग्दीले पनि बेगखोलामा ८० मिटर लामो झोलुङ्गे पुल निर्माण शुरु गरेको छ । गत कात्तिक तेस्रो हप्ता कर सहित रु. २९ लाख ३८ हजारमा ठेक्का सम्झौता गरेको हिमशिखर कन्ट्रक्सनले पुल निर्माणको काम गरिरहेको पूर्बाधार बिकास कार्यालयका निमित्त प्रमुख सन्तोष अर्यालले बताउनुभयो ।

बाढीले बगाएको ठाउँमा मोटरेबल र झोलुङ्गे पुल पुनःनिर्माण भएपछि बर्खा याममा बेनी–जोमसोम यात्रा गर्दा जोखिम, सास्ति र झञ्जट हट्ने अपेक्षा गरिएको छ । पुल महाशाखाले बेनी–जोमसोम–कोरला सडक अन्तरगत महभिर र पोखरबगर स्थित कालीगण्डकीमा दुई वटा मोटरेबल पुल निर्माण गरेको छ ।

बि.स. २०७४ फागुनमा रु. १९ करोडमा ठेक्का लिएको हिम–सगरमाथा–डाँफे–बज्रगुरु जेभीले महभिरमा बनाएको ८० मिटर लामो ११ मिटर फराकिलो पुल सञ्चालनमा आइसकेको छ । पोखरेबगरमा बनाएको ७० मिटर लामो पुल जोड्ने पहुँच मार्ग निर्माण गरेर सञ्चालनमा ल्याउने तयारी भएको छ ।

गण्डकी प्रदेशको भाग्यरेखा मानिएको राष्ट्रिय गौरवको उत्तर दक्षिण जोड्ने कालीगण्डकी कोरिडोर अन्तरगत बेनी देखि कोरला नाका जोड्ने सडकमा आठ वटा मोटर चल्ने पुल निर्माण सकिएका छन् ।

१८६ किलोमिटर दुरिको बेनी–जोमसोम–जोमसोम–कोरला सडक आयोजना अन्तरगत थप एक वटा निर्माणको अन्तिम चरण र १२ वटा निर्माणाधिन रहेका छन् । आयोजना प्रमुख जगत प्रजापतिले थप पाँच ठाउँमा पुल निर्माणको प्रस्ताब गरिएको बताउनुभयो ।

Dhakal lab
प्रतिक्रिया दिनुहोस
Loading...