बेनी । कोभिड–१९ को नयाँ भेरियन्ट ओमिक्रोन सहितको संक्रमण फैलिएपछि जिल्ला प्रशासन कार्यालय म्याग्दीले सेवा प्रवाहमा आलोपालो प्रथा लागू गरेको छ ।
सहायक प्रमुख जिल्ला अधिकारी धिरेन्द्रराज पन्तले बिहिबार सूचना जारी गर्दै माघ ५ गतेदेखि अर्को निर्णय नहुँदा सम्मका लागि पालिका अनुसार आलोपालो गरेर सेवा प्रवाह गरिने जानकारी गराउनुभएको छ ।
बेनी नगरपालिका, धवलागिरी र अन्नपूर्ण गाउँपालिकाका सेवाग्राहीलाई आइतबार, मंगलबार र बिहिबार, रघुगंगा, मंगला र मालिका गाउँपालिकाका सेवाग्राहीलाई सोमबार, बुधबार र शुक्रबार सेवा दिने समयतालिका बनाएको सहायक प्रजिअ पन्तले बताउनुभयो ।
फैलिएको कोरोना संक्रमण नियन्त्रणका लागि भिडभाड हुन नदिनका लागि अत्यावश्यक सेवा बाहेक नागरिकता, राहदानी, राष्ट्रिय परिचयपत्र, नाबालक परिचयपत्र, संघ–संस्था लगायत बिबिध सिफारिस सम्बन्धी सेवाका लागि पालो लगाइएको हो ।
