बेनी, सदरमुकाम अवस्थित बेनी नगरपालिका बाहेक म्याग्दीका पाँच वटा स्थानीय तहमा सञ्चालित मतदाता नामावली संकलन बिशेष अभियानबाट दुई हजार ६०२ जना मतदाता थपिएका छन् ।
जिल्ला निर्बाचन कार्यालय म्याग्दीले मङसिर १७ देखि पुष ९ गतेसम्म धवलागिरी, मालिका, मंगला र रघुगंगा अन्नपूर्ण गाउँपालिकाको केन्द्रमा मतदाता नामावली संकलन गरेको थियो ।
मालिकामा ८३५, मंगलामा ७७९, अन्नपूर्णमा ४६७, रघुगंगामा २८९ र धवलागिरीमा २३२ जना मतदाताको तस्बिर सहितको नामावली संकलन भएको जिल्ला निर्बाचन अधिकारी भिमप्रसाद घिमिरेले जानकारी दिनुभयो ।
धवलागिरी, मालिका र अन्नपूर्णमा मङसिर १७ देखि २९ गतेसम्म, मंगला र रघुगंगामा मङसिर २९ देखि पुष ९ गतेसम्म मतदाता नामावली संकलन अभियान सञ्चालन भएको थियो ।
बेनी स्थित जिल्ला निर्बाचन कार्यालय र प्रशासन कार्यालयमा भने निर्बाचनको मिती घोषणा नहुँदासम्मका लागि मतदाता नामावली संकलन जारी रहने निर्बाचन अधिकारी घिमिरेले बताउनुभयो ।
जिल्ला प्रशासनमा दैनिक ६१ जनासम्म र निर्बाचन कार्यालयमा दैनिक ४० जनाको हाराहारीमा मतदाता नामावली दर्ता हुने गरेको छ । मालिका र मंगला गाउँपालिकाका राजनीतिकर्मीहरु सक्रीय भएकाले बढी मतदाता नामावली संकलन भएको हो ।
सम्भावित वडा र पालिकाका उमेद्वारले गाडी रिजर्भ गराएर सर्बसाधारणलाई नामावली दर्ता गराउन ल्याएका थिए । धवलागिरी र अन्नपूर्णमा भौगोलिक बिकटताका कारण कमले नाम दर्ता गराएका हुन् ।
गाउँपालिकाको केन्द्र अपायक पर्ने भएकाले धवलागिरी र अन्नपूर्णका केही वडाका नागरिक नाम दर्ता गराउन गएनन् । छुटेकाहरु नाम दर्ताका लागि बेनीमा आएका छन् । धवलागिरीको वडा नम्बर ५ मल्कवाङ र ६ मराङका बासिन्दाहरु मालिकाको केन्द्र दरबाङमा पुगेर नाम दर्ता गरेका थिए ।
निर्बाचन कार्यालयका अनुसार अभियान सञ्चालन हुनुअघिसम्म म्याग्दीमा ८० हजार १०० जना मतदाता रहेका थिए । छुटेका र नाम दर्ता गर्न योग्यता पुगेकाहरुलाई लक्षित गरेर म्याग्दीमा दुई चरणमा मतदाता नामावली संकलन अभियान सञ्चालन गरिएको हो ।
एक जना प्रमुख नाम दर्ता अधिकारी, ५ जना दर्तास्थल ब्यवस्थापक, ३ जना दर्ता कर्मचारी, ५ जना सहायक कर्मचारी र ५ जना दर्तास्थल सहयोगी गरि १९ जनाको ३ वटा टोली परिचालन भएका थिए ।
