![](https://dhaulagirikhabar.com/wp-content/uploads/2021/12/Main-todke-Fokus-Plan.jpg)
![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
टोड्के । म्याग्दीको रघुगंगा, मंगला र बेनी नगरपालिकाको सिमा क्षेत्रमा पर्ने पर्यटकीय स्थल टोड्केमा पूर्बाधार बनाउन तीन वटा योजना सञ्चालन भएको छ ।
रघुगंगा गाउँपालिकाले रु. एक करोड दुई लाख ८९ हजार ६७७ को लागतमा पदमार्ग, उद्यान, सडक र उच्च स्थानको खेलमैदान निर्माण गर्न लागेको हो । गाउँपालिकाका अध्यक्ष भबबहादुर भण्डारीले तीन वटै योजना ठेक्का प्रक्रियाबाट कार्यान्वयन गरिएको जानकारी दिनुभयो ।
“गाउँपालिका र पर्यटन मन्त्रालयको लागत साझेदारीमा झिँ देखि टोड्के जोड्ने पदमार्ग निर्माण भइरहेको छ,” उहाँले भन्नुभयो “झिँ–टोड्के सडक र टोड्के हाइअल्टीच्युड खेलमैदान निर्माणका लागि ठेक्का सम्झौता भइसकेको छ ।”
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
वडा नम्बर–५ मा पर्ने झिँ गाउँदेखि टोड्के जोड्ने सिद्ध फुटस्टेप र पार्क निर्माण योजनाका लागि गत साउनमा बेनीको खुसी होम बिल्डर्स प्रा.लीले भ्याट रकम सहित रु. ५८ लाख दुई हजार ७३२ मा ठेक्का सम्झौता गरेको थियो । योजनाको कुल लागत अनुमान रु. एक करोड एक लाख गरिएको थियो ।
गाउँपालिकाका इञ्जिनियर सुदिप गौतमले उकालो बाटोमा दुई मिटर फराकिलो ४२५ मिटर पक्की पदमार्ग, दुई वटा प्रतिक्षालय र दृष्य अवलोकन गर्ने स्थल सहितको उद्यान बनाउन लागिएको जानकारी दिनुभयो ।
यसैगरी रु. ३८ लाख ८० हजार लागत अनुमान गरिएको झिँ–टोड्के सडक निर्माणका लागि बेनीको सम्मान कन्ट्रक्सनसँग रु. २१ लाख ६३ हजार ३१ मा ठेक्का सम्झौता भएको छ । सडकलाई फराकिलो बनाउने, ग्रेड, घुम्ति सुधार तथा नाली बनाउने, ढुङ्गा बिछ्याएर सोलिङ गर्ने योजना छ ।
सडक र पदमार्ग निर्माण भएपछि झिँ हुदै टोड्के जाने पर्यटकहरुले सुरक्षित र सहज रुपमा यात्रा गर्न पाउने वडा अध्यक्ष मनबहादुर थजालीले बताउनुभयो । “यात्रा सुरक्षित, सहज हुने, यात्राअवधी र दुर्घटनाको जोखिम घट्ने अपेक्षा गरिएको छ,” उहाँले भन्नुभयो “पाखोको चिप्लो र भिरालो तथा साघुरो कच्चि पदमार्गमा चिप्लीएर लड्ने समस्या थियो ।”
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
टोड्केमा हाई अल्टिच्युड खेलमैदान बनाउन बेनपा–१ को मनिषा निर्माण सेवासँग रु. २३ लाख २३ हजार ९१४ मा ठेक्का सम्झौता भएको प्रमुख प्रशासकीय अधिकृत अमृत सुबेदीले बताउनुभयो । खेलमैदान निर्माण गर्न रु. ५१ लख २० हजार ८८० लागत अनुमान गरिएको थियो ।
पदमार्ग निर्माण भएपछि समुन्द्रि सतहदेखि दुई हजार २०० मिटर उचाईमा गुराँसको जंगलको बिचमा अवस्थित टोड्केबाट सुर्योदय, धवलागिरी, अन्नपूर्ण रेञ्जका १५ भन्दा बढी हिमाल म्याग्दी, पर्बत र बागलुङको पहाडी भूगोलको मनोरम दृष्य अवलोकन गर्न सकिन्छ ।
धवलागिरी सेञ्चुरी पदमार्गको प्रवेश बिन्दुमा पर्ने टोड्केमा स्वर्गद्धारी आश्रमको शाखा र शिब मन्दिर पनि भएकाले यसको धार्मिक पर्यटकीय सम्भावना समेत छ । स्वर्गद्धारीको शाखा र शिब मन्दिरको जिर्णोद्धार गर्न बिस्तुत परियोजना प्रतिबेदन बनाएर पुरातत्व बिभागमा प्रस्ताब गरिएको छ ।
गत आर्थिक बर्षमा डिभिजन बन कार्यालयको रु. दश लाख सहयोगमा सिद्ध सामुदायिक बन उपभोक्ता समूहले टोड्केमा उद्यान निर्माण भएको थियो । यसैगरी मंगला गाउँपालिकाले पुर्ण गाउँ देखि टोड्के जोड्ने सडक स्तरोन्नति गरेको थियो । यसअघि गण्डकी प्रदेश सरकारको सहयोगमा टोड्केको फेदीमा पर्ने झिँ गाउँमा सामुदायिक घरबास सञ्चालन भएको थियो ।
निजी क्षेत्रले दुई वर्षअघि टोड्केमा होमस्टे र रिसोर्ट सञ्चालन गरेका थिए । दैनिक एक सय जना बास बस्न सक्ने टोड्के होमस्टे तथा रिसोर्ट सञ्चालन भएपछि भ्रमणमा जाने पर्यटकहरुलाई सहज भएको छ । रिसोर्टका सञ्चालक भिमप्रसाद शेरचनले केही समययता आन्तरिक पर्यटकको आगमन र चहलपहल बढेको बताउनुभयो ।
नेपाल पर्यटन बोर्डको गण्डकी प्रदेश कार्यालय पोखरा र नेपाल एसोसियसन अफ टुर एण्ड ट्राभल एजेन्ट्स (नाटा)को टोलीले मंगलबार टोड्केको पर्यटकीय सम्भाब्यता अध्ययन गरेर फर्किएको छ । टोड्््केबाट नयाँ गन्तब्यको अध्ययन शुरु गरेको नाटाका कार्यक्रम संयोजक तारा गौतमले बताउनुभयो ।
“नेपालमा आउने पर्यटकहरुलाई घुमाउने स्थान खोज्न निस्किएका हौ,” उहाँले भन्नुभयो “म्याग्दीको टोड्के, मुस्ताङको नाउरीकोट, गुरुसाङबो गुम्बा, भुरतुछो र सेकुङ ताललाई प्रर्वद्धन गर्ने योजना छ ।” पर्यटकीय स्थलहरुको निरिक्षण गरेर पर्यटक ल्याउनका लागि प्याकेज बेच्ने नाटाका प्रदेश अध्यक्ष सञ्जयकान्त सिग्देलले बताउनुभयो ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)