बेनी । आइतबार रातिदेखिको बर्षातका कारण म्याग्दीको बेनी–दरबाङ लगायत ग्रामिण क्षेत्रलाई सदरमुकाम बेनीसँग जोड्ने सडक अवरुद्ध भएका छन् ।
सडक अवरुद्ध हुँदा दशैमा आफन्तकहाँ टिका थाप्न जाने र घर फर्कने सर्वसाधारणलाई गन्तब्यमा पुग्न समस्या भएको छ । साथै काम बिषेशले हिडेकाहरु पनि गन्तब्यमा पुग्न नसकेर समस्यामा परेका छन् ।
धवलागिरी, मालिका र मंगला गाउँपालिकालाई सदरमुकाम बेनीसँग जोड्ने बेनी–दरबाङ सडक मालिकाको बाङ्गेपहिरो र बेनी नगरपालिका र मंगला गाउँपालिकाको सिमानामा पर्ने फापरखेतको घुमाउनेमा खसेको पहिरोका कारण अवरुद्ध बनेको जिल्ला प्रहरी कार्यालयले जनाएको छ ।
प्रहरी निरीक्षक बिरेन्द्रराज गुरुङले म्याग्दीको उत्तरी क्षेत्र हुदै मुस्ताङ जोड्ने बेनी–जोमसोम सडकको काभ्रे खण्डमा समस्या देखिएपनि मर्मत गर्दै गाडी आवत जावत गर्ने ब्यवस्था मिलाइएको बताउनुभयो ।
बर्खातसँगैको पहिरोले अन्य ग्रामिण शाखा सडकहरुको यातायात सेवा पनि प्रभावित बनेको छ । मालिकाको केन्द्र दरबाङ देखि धवलागिरीको मुना जोड्ने सडक थापाचौरको भिरबाट खसेको पहिरोले अवरुद्ध बनेको छ ।
बर्खातका कारण भित्र्याउने बेला भएको धानबालीमा क्षति पुगेको छ । कृषकहरुले काटेर सुकाएको धान पानीले भिजेको छ । यसैगरी हुरीले धानका बोट ढलाएर क्षति गरेको कृषकहरुले बताएका छन् ।
म्याग्दीको ताकम, मुना, देबिस्थान, घतान, कुहुँ, बिम, पर्वतको लेकफाँट क्षेत्रका कृषकहरुले दशै लगत्तै मुख्यबाली धान भित्र्याउने तयारी गरेका थिए ।
