![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी । म्याग्दीको बेनी नगरपालिका–३ भकिम्लीको चिनाखेतका घरघरमा खानेपानी सुबिधा बिस्तार भएको छ ।
बेनी नगरपालिकाले निर्माण गरेको चिनाखेत खानेपानी आयोजनाबाट ७६ घरधुरी लाभान्वित भएका हुन् । नगरपालिकाका असिस्टेन्ट सब इञ्जिनियर चन्द्रबहादुर थापाले रु. ५१ लाख ५४ हजार ०४० को लागतमा सो खानेपानी आयोजना निर्माण भएको जानकारी दिनुभयो ।
“ठेक्का लिएको सुन्दर निर्माण सेवाले मुहान, मुख्य र शाखा पाइपलाइन, टंकी बनाएर घरघरमा पाइप मार्फत पानी पु¥याएको छ,” उहाँले भन्नुभयो “रु. सत्तरी लाख बजेट बिनियोजन भएको आयोजना ठेक्का मार्फत अनुमानीत भन्दा करिब रु. १८ लाख कम खर्चमा निर्माण भएको हो ।”
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
बि.स. २०७७ पुष २१ गते ठेक्का सम्झौता गरेका निर्माण कम्पनीले कोरोना भाइरसको जोखिम, निषेधाज्ञा र बर्षातको असहज अवस्थाका बावजुद निर्धारित समय २०७८ असार मसान्तभित्रनै आयोजना निर्माण गरेको नगरपालिकाले जनाएको छ ।
रातोपहरा र लेखानीको मुहानमा दुई वटा इन्टेक, ५० एमएम क्षमताको ३२० मिटर मुख्य पाइपलाइन र नौ किलोमिटर बितरण लाइन निर्माण भएको छ । बिस घनमिटर क्षमताका दुई वटा पानी संकलन गर्ने टंकी निर्माण भएको छ ।
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
खानेपानी बितरणलाई दिगो र ब्यवस्थित बनाउन प्रत्येक घरमा मिटर जडान भएको छ । पाइपबाट घरघरमा खानेपानी बितरण हुन थालेपछि दुषित पानीका कारणले हुने स्वास्थ्य समस्यामा कमी, समय र श्रमको बचत भएको स्थानीयबासी डेकबहादुर घर्तिले बताउनुभयो ।
“यसअघि सार्बजनिक धाराबाट खानेपानी बितरण गरिदै आएको थियो,” उहाँले भन्नुभयो “खडेरीमा पर्याप्त पानी आपुर्ति नहुँदा खानेपानीका बिषयमा हुने बिवादको अन्त्य भएको छ ।” बजेट कम भएकाले घरघरमा धारा निर्माण गरिएको छैन् ।
चालु आर्थिक वर्षमा उपभोक्ता र नगरपालिकाको साझेदारीमा घरघरमा खानेपानीका धारा निर्माणका लागि पहल गरिएको वडा अध्यक्ष पदम पुनले बताउनुभयो । बेनी नगरपालिकाले गत आर्थिक वर्ष २०७७÷७८ मा चिनाखेत र वडा नम्बर २ मा गौस्वारा तमाने खानेपानी आयोजना सञ्चालन गरेको थियो ।
ठेक्का मार्फत कार्यान्वयन गरिएको गौस्वारा तमानेको संरचना निर्माण सकिएको छ । रु. ६० लाख अनुमान गरिएको आयोजना निर्माणका लागि सुन्दर–कालीगण्डकी जेभीले रु. ४५ लाख ८० हजार ९७९ मा ठेक्का लिएको थियो । मुहानमा एक वटा इन्टेक, पाँच घनमिटर क्षमताको एक वटा र बीस घनमिटर क्षमताको तीन वटा टंकी बनाएर घेराबार भएको सबइञ्जिनियर कमल थापाले बताउनुभयो ।
१६ वटा बितरण च्याम्बर, दुई वटा ब्रेक प्रेसर ट्याङ्क, ५० एमएम क्षमताको दुई हजार २८२ मिटर मुख्य पाइपलाइन, ५०० एमएमको ६६०, ४० एमएमको ७०९ र ३२ एमएमको एक हजार ९१४ मिटर शाखा लाइन निर्माण भएको छ । चालु आर्थिक वर्षमा मिटर, स्याडल, फेरल र घरमा जडान गरेर १०३ घरधुरीमा खानेपानी बितरण गर्न नगरपालिकाबाट रु. ५४ लाख बिनियोजन भएको छ ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)