बेनी । म्याग्दीका विभिन्न ठाउँमा रहेका तालतलैयाहरुमा आइतबार जनैपूर्णीमा पर्वको अवसरमा पुजाआजा भएको छ ।
अन्नपूर्ण गाउँपालिकाको खयरभारानी, कान्छिबाराही, प्यारीबाराही, नागीबाराही, कालीबराह, रघुगंगाको रिखार र नौलीबराह तालमा कोरोना महामारीका बीच स्वास्थ्य सुरक्षा मापदण्डको पालना गरेर पुजाआजा भएको हो ।
ताल भएका र छिमेकी गाउँका बासिन्दाहरु पुजाआजाका लागि पुगेका थिए । पछिल्ला दुई वर्ष कोरोना महामारीका कारण न्युन संख्यामा भक्तजनको उपस्थितिमा पुजाआजा भएको छ ।
अन्नपूर्ण हिमालको दक्षिणी मोहोदाको फेदीमा समुन्द्रि सतहदेखि चार हजार ६६० मिटरको उचाइमा रहेको खयर भारानी तालमा विगतका भन्दा कम भक्तजनको उपस्थितिमा पुजा सञ्चालन भएको सहभागिले जानकारी दिएका छन् । तीन सय भन्दा बढी भक्तजन पुगेका थिए ।
जनै पूर्णीमाका दिन म्याग्दीका तालतलैयामा रहेको थानमा दर्शन, पुजाआजा र भाकल गरेमा मनोकांक्षा पुरा हुने जनविश्वास छ । रिखार र खयरबाराहीको दर्शनका लागि दुई दिनको उकालो पैदलयात्रा गरेर भक्तजनहरु त्यहाँ पुगेका थिए । भाकल गरेको पुरा भएमा त्यहाँ गएर पुजाआजा गर्ने र बली चढाउने चलन छ ।
खयरबाराहीको साथै म्याग्दीको राम्चे स्थित नांगीबाराही, हिस्तानको प्यारी बाराही, शिखको कान्छि बाराही लगायतका तलाउहरुमा पनि जनैपूर्णीमाको अवसरमा पुजाआजा गरिएको छ । कोरोना महामारी फैलिन नदिन भक्तजनलाई मास्क, स्यानीटाइजरको प्रयोग अनिबार्य गराउनुका साथै भिड हुन नदिएको पुजा ब्यवस्थापन समितिहरुले जनाएका छन् ।
