बेनी, नेपाली सेनाले म्याग्दी स्थित धौलागिरी हिमालको आधार शिविर क्षेत्रबाट पाँच मेट्रिक्टन फोहोर संकलन गरेको छ ।
म्याग्दीको धवलागिरी गाउँपालिकाको वडा नम्बर ४ मा पर्ने आठ हजार १६७ मिटर अग्लो धौलागिरी संसारको सातौ अग्लो हिमाल हो । नेपाली सेनाको “सफा हिमाल अभियान २०२१” अन्तरगत धौलागिरी हिमाल क्षेत्रबाट पाँच हजार २० किलोग्राम फोहोर संकलन गरिएको सेनाले जनाएको छ ।
हिमालबाट संकलन गरिएको नकुहिने चार हजार ७२० किलोग्राम फोहोर प्रसोधन गरेर पुनप्रयोग र ब्यवस्थापन गर्ने प्रयोजनका लागि शुक्रबार अभ्नि भेन्चर्स प्रा.लीलाई हस्तान्तरण गरिएको थियो । तीन सय किलोग्राम फोहोर धवलागिरी गाउँपालिकालाई हस्तान्तरण गरेको छ ।
फोहोर संकलनका क्रममा हिमालमा फेला परेको दुई वटा मानव अवसेश (कंकाल) आवश्यक अनुसन्धान तथा कानुनी प्रक्रियाको लागि जिल्ला प्रहरी कार्यालय म्याग्दीलाई हस्तान्तरण गरिएको थियो । युनिलिभर नेपाल प्रा.ली.को आर्थिक सहयोगमा सञ्चालित हिमाल सरसफाई कार्यक्रमको साझेदार संस्था पिक प्रमोसन हो ।
हिमाल सरसफाईका लागि धौलागिरी क्षेत्रमा गएको टोली जेठ ३ गते फर्किएको छ । धौलागिरी र आमादब्लम हिमालको सरसफाई गरिसकेको सेनाले मकालु हिमाल सरसफाई जेठ ११ गतेसम्म निरन्तरता दिएको छ । सगरमाथा, ल्होत्से र पुमोरीको सफाई कार्यक्रम जेठ १५ गतेसम्म जारी रहने नेपाली सेनाद्धारा जारी विज्ञप्तिमा उल्लेख छ ।
सरसफाई टोलीले धौलागिरी हिमालमा सन २००६ मा दुर्घटना भएका एयर डाइनेष्टिको हेलिकप्टरको अवशेस फेला पारेको थियो । आधार शिविरमा आरोही र भम्रणमा पुगेका पर्यटक, पथ प्रदर्शक तथा तिनका सहयोगीले प्रयोग गरेर फालेका कपडा, ग्यास सिलिन्डर, भारी बोक्ने क्यारी, सिसी, रबर र फलामका भाँडाकुँडा, खानाका बट्टा, चियाका थर्मस, डोका, खादा, खाजा प्याक गरिएका प्याकेट तथा प्लास्टिक थुप्रिएको थियो ।
स्थानीय पर्यटन व्यवसायी हरिप्रसाद तिलिजाले बर्षौको प्रयासपछि हिमाल सरसफाई भएकोमा खुसी व्यक्त गर्दै यसलाई निरन्तरता दिनुपर्ने बताउनुभयो । हेलिकप्टरमार्फत पु¥याइएका टायर, धातुका सामग्री र आरोहणमा प्रयोग गरिएका उपकरण आधार शिविरमै अव्यवस्थित तवरले फाल्ने कार्यलाई रोक्नुपर्ने उहाँको भनाई छ ।
