बेनी ः एकिकृत सेवा कार्यालय म्याग्दी मार्फत आर्थिक वर्ष २०८२÷८३ मा सञ्चालन भएका योजना मार्फत चार दशमलब १९ किलोमिटर पदमार्ग निर्माण भएको छ ।
गत वर्ष कार्यालयले सञ्चालन गरेका पर्यटन पूर्वाधार निर्माणसम्बन्धी २४ वटा योजनाका लागि रु. एक करोड ४० लाख बजेट बिनियोजन भएकोमा रु. एक करोड १० लाख बजेटका १९ वटा योजना सम्पन्न भएका हुन् ।
योजनामार्फत पर्यटकीयस्थलमा पक्की र कच्ची पदमार्ग, विश्रामस्थल, आश्रयस्थल, पर्खाललगायतका पूर्वाधार निर्माण भएको कार्यालयका प्रमुख सम्झेर घर्ती क्षेत्रीले जानकारी दिनुभयो ।
“सबै योजना उपभोक्ता समितिमार्फत कार्यान्वयन भएका हुन”, उहाँले भन्नुभयो, “प्रतिकूल भूगोल, मौसम र अन्य कारणले रु. ३० लाख बजेटका पाँच वटा योजना कार्यान्वयन भएनन् ।” पर्यटकीय पूर्वाधार बनेपछि पर्यटक, स्थानीयवासी र पर्यटक मजदुरलाई आवतजावतमा सहज भएको छ ।
मालिका गाउँपालिका–७ बिमको डाडागाउँमा पाँच सय २० मिटर पक्की पदमार्ग र धार्मिक स्थल प्रभुचेलामा तीन कोठे आश्रयस्थल भवन निर्माण भएको छ । मालिका–४ मा गौखेरे देखि मतौका चनौटे र वडा नम्बर ३ को लामखोरिया डाडागाउँ जोड्ने पदमार्ग निर्माण भएको छ ।
बेनी नगरपालिका–९ मा ढाडापधेरा आरोटा, पाखाथर, ८ को बराहपाखोेमा पदमार्ग र १ को सनातन धार्मिक आश्रम र २ को लभ्लीहिलमा घेराबार निर्माण भएको छ । मंगला गाउँपालिका–४ को गम्फाधुरी र धवलागिरी गाउँपालिका–४ को खिवाङ–चेचुङ पदमार्ग निर्माण भएको छ ।
रघुंगा गाउँपालिका – ३ गलेश्वर देखि बगैचा, ५ र ६ को फुलडाडामा पदमार्ग तथा ३ को गायत्री मन्दिरमा सत्तल निर्माण भएको छ । अन्नपूर्ण गाउँपालिका–४ नारच्याङ झरना, ७ को टिकोट देखि सोबन्ध, १ मारका, ६ चित्रे हुदै घान्द्रुक देउराली र ३ को फगाम–सुवा–दुवारी–मतिचौर जोड्ने पदमार्ग निर्माण भएको छ ।
चालु आर्थिक वर्ष २०८३÷०८४ का लागि गण्डकी प्रदेश सरकारबाट २४ वटा योजनाका लागि रु. एक करोड ८५ लाख बजेट प्राप्त भएको छ । बजेट बिनियोजन भएका योजनाहरुको सर्वेक्षण, लागत अनुमान तयार र उपभोक्ता समिति गठन गरि कार्यान्वयन प्रक्रिया थालिएको कार्यालयका इञ्जिनियर सुमन बोगटीले बताउनुभयो ।
