बेनी, ः म्याग्दीको रघुगङ्गा गाउँपालिका–४ दर्मीजामा ‘होमस्टे’ (घरबास) सञ्चालन भएको छ ।
दर्मीजाका स्थानीय बिप्रसाद पुनले वैदेशिक रोजगारीको विकल्प र सहरको बसाई छाडेर जन्मथलो फर्किएर होमस्टे सञ्चालन गर्नुभएको हो । पुर्खाले बनाएको पुरानौ शैलीको मौलिक घरलाई मर्मत गरेर पुनले सञ्चालन गरेको घरबासलाई ‘दर्मीजा होमस्टे’ नामाकरण गर्नुभएको छ ।
“करिब एक दशक रोजगारीका लागि इराक र ब्यवसाय गरेर काठमाडौमा बिताए,” उहाँले भन्नुभयो “विदेश र बजारमा आर्जेको ब्यवसायिक ज्ञान, सिप र पुजी परिचालन गरेर ग्रामिण क्षेत्रमा कृषिमा आधारित पर्यटन विकासका लागि होमस्टे सञ्चालन गरेको हो ।”
होमस्टे सञ्चालन गर्न वि.स. २०१९ मा हजुरबुवाले दर्मिजामा बनाएको घरलाई पुरानै मौलिक शैलीमा मर्मत गर्नुभएको छ । चार वटा कोठामा दैनिक १० जना पाहुना बास बस्न सक्छन् । घर र कोठामा परम्परागत मौलिक घरायसी सामग्री, भाडाकुडा र कृषि औजारहरुलाई सजाएर राखिएको छ ।
काठको ठेकी, मुडुस, तामाका भाडा, घैटो, हलो, जुवा, स्याखु, हरडुब्लो, लाफु, डोका, डाली लगायतका सामग्री सजाएको घरका झ्याल, ढोका र भित्रि भागपनि मौलिक छन् । यहाँ पुराना घरमा बसेको अनुभव गर्न पाइने आन्तरिक पर्यटक प्रदिप मगरले बताउनुभयो ।
पृष्ठभूमिमा धौलागिरि हिमाल रहेको दर्मीजामा मगर समुदायको बाहुल्य बसोबास छ । प्रकृति, संस्कृति र ग्रामिण जिवनशैलीमा रमाउन पाउनु यहाँको आकर्षण हो । घरबासको कोठाबाटै दर्मीजा गाउँ र हिमालको अवलोकन गर्न सकिन्छ ।
स्थानीय खाद्यान्न र तरकारी तथा पशुजन्य वस्तु होमस्टेका परिकार हुन् । दिडो, रातो च्याउ, कुखुरा, खसीबोकाको मासु, साग, सब्जी, तरकारी, गाउँघरमा पालेका गाईभैसीको दूध, दही र मोहीको स्वाद लिन पाइन्छ । खाना र बसेको दैनिक रु. एक हजार ५० शूल्क तोकिएको छ ।
दर्मीजा गाउँको फेदी र राहुघाट नदीको किनारमा रहेको प्राकृतिक तातोपानी कुण्डमा स्नान गरेर थकान मेटाउन सकिन्छ । जागा छहरा दर्मीजाको आकर्षण हो । दर्मीजामा आउने पर्यटकको बसाई सम्बाउनका लागि दुई घण्टा पैदलयात्रापछि पुगिने नागींडाडालाई सहायक गन्तब्यको रुपमा विकास गराउन पूर्वाधार निर्माण भैरहेको छ ।
होमस्टेले ओझेलमा परेको दर्मिजामा पर्यटकको चहलपहल बढाएको उहाँले बताउनुभयो । बेनी देखि २४ किलोमिटर उत्तरतर्फ रहेको दर्मीजा पुग्न कच्चि सडकमा एक घण्टा ३० मिनेटको यात्रा गर्नुपर्छ । दर्मीजा देखि चिमखोला हुदै सोवाङ धुरी, धौलागिरि आइसफल, आधार शिविर र कालीबराह ताल हुदै मुस्ताङ जान सकिन्छ ।
धौलागिरि आइसफल हुदै मुस्ताङ जोड्ने पदमार्गमा पूर्वाधार बनाएर सडकका कारण विस्थापित बनेको बेनी–जोमसोमको बैकल्पिक पदमार्ग बनाउन काम भैरहेको छ । हाल वार्षिक दुई देखि तीन समुह पर्यटक दर्मीजा हुदै धौलागिरि आइसफल भएर मुस्ताङ जाने गरेको छन् ।
पुनले होमस्टेको साथै फलफुल बगैचा पनि स्थापना गर्नुभएको छ । होमस्टे परिसरमा किबी, सुन्तला र कागतीका बगैचा छन् । पुनका परिवारका सदस्यहरु काठमाडौमै ब्यवसाय गरेर बसेका छन् । होमस्टे र कृषि फार्ममा दुई जनाले नियमित रोजगारी पाएका छन् ।
अधिकांश मानिसहरु सुविधा, अवसर र रोजगारीको खोजीमा गाउँबाट सहर र सहरबाट विदेश पलायन भइरहेको अवस्थामा बिप्रसादले गाउँमै सम्भावना र अवसर भएको सन्देश दिनुभएको छ ।
