बेनी ः बेनी नगरपालिका–४ सिङ्गास्थित धौलागिरि माध्यमिक विद्यालयका विद्यार्थीलाई हाते ट्याक्टर मर्मत सम्बन्धी तालिम सञ्चालन गरिएको छ ।
बेनी नगरपालिकाको ‘हामी सक्छाँै, हामी गर्छौं’ कार्यक्रममार्फत धौलागिरि माविले विद्यार्थीलाई व्यावसायिक सीप सिकाउन खेतबारी खनजोतमा प्रयोग हुने हाते ट्याक्टर मर्मत सम्बन्धि तालिम सञ्चालन भएको हो ।
कक्षा ८, ९ र ११ का २० जना विद्यार्थीहरुका लागि १९ दिने हाते ट्याक्टर मर्मत सम्बन्धी तालिम सञ्चालन गरिएको विद्यालय ब्यवस्थापन समितिका अध्यक्ष समेत रहेका वडा अध्यक्ष अणबहादुर खड्का (भगवान)ले जानकारी दिनुभयो ।
“खेतबारी खनजोतमा गोरुको विकल्पमा प्रयोग भइरहेको हाते ट्याक्टरमा समस्या आउँदा मर्मत गर्ने जनशक्ति गाउँघरमै तयार पार्न परिक्षापछिको फुर्सदको समयमा तालिम दिएका हौ,” उहाँले भन्नुभयो “सिप सिकेपछि विद्यार्थीहरुलाई दैनिक जिवनका साथै पेशा, ब्यवसाय गर्न प्रेरित गर्न सिपमुलक तालिम दिने गरेका छौ ।”
यसअघि विद्यार्थीहरुलाई च्याउ खेती, अतिथि सत्कार, रंगरोगन र मुढा बुन्ने तालिम दिइएको थियो । बेनी नगरपालिकाका प्रमुख सुरत केसीले विद्यार्थी र शिक्षालाई सीप र श्रमसँग जोड्न १६ वटा विद्यालयका माध्यमिक तहमा अध्ययन गर्ने विद्यार्थीलाई विद्यालयमै सीप सिकाउन ‘हामी सक्छाँै, हामी गर्छौं’ कार्यक्रमलाई निरन्तरता दिएको जानकारी दिनुभयो ।
‘हाउस वायरिङ’, ‘प्लम्बिङ,’ कपाल काट्ने, अतिथि सत्कार, खाना पकाउने, प्रेसर कुकर बनाउनेलगायत सीपमूलक तालिम सञ्चालन गर्न नगरपालिकाले १६ वटा विद्यालयलाई चालु आर्थिक वर्षमा रु. एक लाखका दरले बजेट उपलब्ध गराएको छ ।
