बेनी। म्याग्दीबाट नवनिर्वाचित प्रतिनिधीसभा सदस्य महाविर पुन चुनाव जिते लगत्तै किताब बिक्री गर्न पोखरा पुग्नुभएको छ ।
स्वतन्त्र उमेद्वार बनेर दोब्बर मतान्तर सहित सानदार जित हाँसिल गरेका महाविरले सोमबार पोखराको पृथ्वीचोक, महेन्द्रपुल लगायत ठाउँमा आफ्नो आत्मकथा बिक्री गर्नुभएको हो ।
अन्तरिम सरकारको शिक्षा, विज्ञान तथा प्रबिधी मन्त्रीबाट राजिनामा दिएर पुनले जन्मथलो म्याग्दीमा चुनाव लड्न आउनुभएको थियो । पोखरामा पुनसँग फोटो खिच्ने र हस्ताक्षर गरेर किताब किन्नेको भिड लागिरहेकको छ । पुनले बिरगञ्जको कृषि औजार कारखाना चलाउने भन्दै जेनजी आन्दोलन अघि पनि देशका विभिन्न ठाउँ पुगेर किताब बेच्ने गर्दै आउनुभएको थियो ।
२३ र २४ भदौको जेनजी आन्दोलनपछि बनेको पूर्वप्रधानान्यायाधिश सुशीला कार्की नेतृत्वको सरकारमा उहाँ करिब चार महिना शिक्षामन्त्री बिन्नुभयो । महावीरलाई राष्ट्रिय स्वतन्त्र पार्टी (रास्वपा) ले समर्थन गरेको थियो । लोकप्रिय मतका साथ म्याग्दीमा चुनाव जितेलगत्तै समर्थकहरुलाई बिजयउत्सव मनाउने नाममा तडकभडक नगर्न अनुरोध गर्दै आफ्नै पुरानो दिनचर्यामा फर्कनुभएको हो ।
पुनले २२ हजार ८५० मत ल्याएर विजयी हुनुभएको थियो । उहाँका प्रतिस्पर्धी नेकपा एमालेका हरिकृष्ण श्रेष्ठले सात हजार नौ सय १० मत पाउनुभयो । नेपाली कांग्रेसका कर्णबहादर भण्डारीले ६ हजार ६७६ मत पाउनुभयो ।
चुनाव जितेर पोखरामा किताब बेचिरहेका महावीरको एक व्यक्तिसँग विवाद भइरहेको एउटा भिडियो समाजिक सञ्जालमा भाइरल बनेको छ । हस्ताक्षर गर्दै किताब बेचिरहेका महावीरलाई जनताले जिताएको किताब बेच्न हो भनेर ती व्यक्तिले प्रश्न गरेका छन् ।
जनताले प्रत्यक्ष मत दिएर जिताएको मान्छेको काम किताब बेच्ने नभएको बताउँदै ती व्यक्ति र महावीरबीच विवाद बढेको देखिन्छ । ‘तपाईंको काम यो होइन । कारखाना चलाउने मान्छे सांसद किन भएको त ? जनताले प्रत्यक्ष निर्वाचित गरेको मान्छेले किताब बेच्ने हो ?’ महावीरलाई उनले प्रश्न सोधेका छन, ‘तपाईंको काम यो होइन, जनताले कुन म्यान्डेड दिएका छन, त्यही गर्नु न ।’
जनताले कारखाना चलाउन म्यान्डेड दिएको महावीरले जवाफ फर्काए । उनलाई फेरि ती व्यक्तिले प्रश्न गर्छन, ‘कारखाना चलाउने मान्छे किन सांसद उठेको त ? पृथ्वीचोकमा महावीरसँग नोकझोंक चलेको थियो । धकेलिएको भन्दै केहीबेर भनाभन भएको भिडियो यतिखेर सामाजिक सञ्जालमा भाइरल छ ।
म्याग्दीका जनताले जिताएर नीति निर्माणको तहमा पठाएका सांसद महावीर फेरि किन किताब बेचिरहेका छन् त ? हामीले महावीरलाई प्रश्न गरेका थियौं । महावीरले आफ्नो फुर्सद भएर किताब बेचेको जवाफ दिएका छन् ।
