बेनी, जिल्लाका नौ सय २३ जना किशोरीलाई पाठेघरको मुखको क्यान्सरविरुद्धको ‘ह्युमन पापिलोमा भाइरस’ (एचपीभी) खोप लगाइने भएको छ ।
म्याग्दीका ४५ वटा वडामा रहेका एक सय पाँच वटा विद्यालयका कक्षा ६ मा अध्ययन गर्ने छात्रा र विद्यालय नजाने १० वर्ष उमेरका किशोरीलाई अभियानमार्फत खोप सञ्चालन गर्न लागिएको हो ।
यही माघ २७ देखि फागुन ५ गतेसम्म खोप अभियान सञ्चालन गरिने भएकाले खोप पूर्ण रूपमा सुरक्षित रहेकाले निर्धक्कसँग लगाउन प्रदेश जनस्वास्थ्य कार्यालय म्याग्दीका प्रमुख भुवन ठकुराठीले आग्रह गर्नुभयो ।
उहाँका अनुसार जिल्लामा रहेका निजी तथा सामुदायिक विद्यालयमा अध्ययनरत किशोरीलाई सम्बन्धित विद्यालयमा खोप केन्द्र स्थापना गरी खोप लगाइने छ । यस अवधिमा गत वर्ष खोप लगाउन छुट भएका कक्षा ७ देखि कक्षा १० सम्म अध्ययरत किशोरी तथा विद्यालय नजाने ११ वर्षदेखि १४ वर्ष उमेर समूहका किशोरीलाई पनि खोप दिइने ठकुराठीले बताउनुभयो ।
बेनी नगरपालिका र अन्नपूर्ण गाउँपालिकाम माघ २७, मंगला, मालिका र धवलागिरीमा माघ २८, र रघुगंगामा फागुन ४ र ५ गते अभियान सञ्चालन गर्ने कार्यतालिका बनाइएको छ । बेनीमा तीन सय ५१, मंगलामा एक सय १८, मालिकामा एक सय ८७, धवलागिरीमा एक सय ५७, रघुगंगामा एक सय एक र अन्नपूर्णमा ७४ जना छात्रालाई खोप लगाउने लक्ष्य राखिएको छ ।
विद्यालय नजाने १० वर्षका छ जना र गत वर्ष छुटेका चार जनालाई खोप लगाउने लक्ष्य रहेको छ । अभियानका लागि एक सय सात स्वास्थ्यकर्मी र एक सय सात जना स्वंसेवक परिचालन गरिने कार्यालयका सूचना अधिकारी गणेश सुवेदीले बताउनुभयो ।
