बेनी ः पर्वतको जलजला गाउँपालिकाको केन्द्र लामाखेतमा नदी नियन्त्रण योजना निर्माण शुरु भएको छ ।
लामाखेतमा रहेको जलजला गाउँपालिकाको कार्यालय, बस्ति र सार्वजनिक सम्पत्तीलाई कालीगण्डकीमा आउने बाढी र कटानबाट बचाउनका लागि सिचाई तथा जलस्रोत व्यवस्थापन आयोजना कार्यालय पोखरा मार्फत योजना सञ्चालन भएको हो ।
कुश्मा नगरपालिका–४ स्थित अर्मादी र जलजला गाउँपालिकाको लामाखेतमा एक सय २९ मिटर लामो ‘कम्पोजित’ प्रबिधीको पर्खाल निर्माणका लागि रु. चार करोड ८३ लाख दश हजार पाँच सय ६८ लागत अनुमान गरेर ठेक्का आव्हान भएको थियो ।
रु. दुई करोड ९६ लाख ३४ हजार आठ सय ३७ मा गत असारमा ठेक्का सम्झौता गरेको नकुल–बिआरटी–शाय जेभीले कार्यक्षेत्रमा काम थालेको आयोजना कार्यालयका इञ्जिनियर नरजङ गुरुङले बताउनुभयो ।
“चालुु आर्थिक वर्ष भित्रनै कम्पोजित पर्खाल निर्माण सम्पन्न गर्ने लक्ष्य रहेको छ,” उहाँले भन्नुभयो “भुईमा चार मिटर चौई भएको तीन मिटर अग्लो कंक्रिट र त्यसमाथी ग्याविन पर्खाल निर्माण हुनेछ् ।”
यस वर्ष बेनी सहित म्याग्दी र कालिगण्डकी नदी कटानका कारण जोखिममा परेका बजार तथा बस्ती संरक्षणका लागि म्याग्दी, पर्वत र मुस्ताङ गरेर छ वटा नदी नियन्त्रण तथा बस्ती संरक्षण योजना सुरु भएका आयोजना कार्यालयका प्रमुख बिदुुरमान श्रेष्ठले बताउनुभयो ।
ती योजनाको ठेक्का सम्झौता भई निर्माणका लागि निर्माण व्यवसायी कार्यस्थलमा परिचालन भइसकेका छन् । ती आयोजनाहरुको कुल लागत अनुमान रु. २० करोड २९ लाख ७६ हजार आठसय ३९ रहेको छ ।
