म्याग्दी ः केही दिनयता म्याग्दीका होटल तथा लज भरिभराउ भएका छन । म्याग्दी र मुस्ताङका पर्यटकीयस्थल घुम्न आएका आन्तरिक पर्यटकले होटल तथा लज भरिभराउ भएका हुन ।
होटल तथा रेष्टुराँ व्यवसायी संघ म्याग्दीका पुर्व अध्यक्ष बाबुराम आचार्यले पाहुनाको चाप बढेर होटल भरिभराउ भएका जानकारी दिनुभयो । “देशका विभिन्न ठाउँमा भ्रमणका आएका पाहुनाले होटल भरिएका हुन्,” उहाँले भन्नुभयो, “दसै तिहार छुट्टीको सिजनको अन्तिम समयमा एकै पटक ठूलो संख्यामा पाहुना आउँदा ब्यवस्थापनमा समस्या भएको छ ।”
बेनी, गलेश्वर, पोखरेबगर, भुरुङ–तातोपानी, दाना, घोडेपानी, सिङ्गा तातोपानीका होटल आन्तरिक पर्यटकले भरिभराउ बनेका हुन । होटल तथा रेष्टुराँ व्यवसायी संघका अनुसार बेनीमा रहेका ५० होटलमा एक हजार जना बास बस्न सक्ने क्षमता छ ।
म्याग्दीका होटल भरिएपछि शुक्रबार साँझ पाहुनाहरुलाई बागलुङ र कुश्मामा रोकिएको संघका पुर्व अध्यक्ष आचार्यले बताउनुभयो । काठमाडौं पोखरा, चितवन, विराटनगर, रुपन्देहीलगायत देशका सबैजसो जिल्लाबाट म्याग्दी हुँदै मुस्ताङ जाने आन्तरिक पर्यटकको ओइरो लागेको छ ।
दसैअघि सम्म म्याग्दीका पर्यटकीय स्थल सुनसान भएका थिए । मौसममा सुधार र यातायात सहज भएपछि दसै लगत्तै शुरु भएको पाहुनाहरुको चहलपहल तिहार सकिएपनि रोकिएको छैन् । जिल्ला ट्राफिक प्रहरी कार्यालयका प्रमुख विशाल परियारले सार्वजनिक, निजी गाडी र मोटरसाइकलमा मुस्ताङ जाने आउने आन्तरिक पर्यटकहरुको सङ्ख्या ह्वात्तै बढेको बताउनुभयो ।
पछिल्लो दुई दिनयता दैनिक सात सय वटा भन्दा बढी सवारी साधन बेनी–जोमसोम सडकमा आवतजावत गरिरहेका छन् । यसअघि दैनिक एक सय देखि एक सय ५० सवारी साधन आवतजावत गर्दथे ।
पर्यटकीय याम, अनुकूल मौसम, चाडपर्वको बिदा भएकाले विद्यार्थी, व्यापारी, कर्मचारीलगायत विभिन्न पेसा व्यवसाय गर्ने मुस्ताङ घुम्न आएका अन्नपूर्ण गाउँपालिका–२ भुरुङ–तातोपानीका होटल व्यवसायी राजु हमालले बताउनुभयो ।
यस वर्ष म्याग्दीको मौरिस हर्जोग पदमार्ग र अन्नपूर्ण आधार शिविर नयाँ गन्तब्य स्थलको रुपमा विकास भएको छ । थला परेका होटल तथा रेष्टुराँ व्यवसायीले राहतको महसुस गरेका छन । मुस्ताङ जाने आउने सवारी साधनको चाप बढेसँगै बेनी–जोमसोम सडकमा जाम हुन थालेको छ ।
