बेनी ः म्याग्दीको बेनी नगरपालिका–४ सिंगामा दूध संकलन केन्द्र सञ्चालन भएको छ ।
बास्कुना कृषि सहकारी संस्थाले स्थानीय किसानले उत्पादन गरेको दूध संकलन गरेर बजारीकरणको व्यवस्था मिलाएको हो । संकलन केन्द्र सञ्चालन र बजार सुनिश्चितता भएपछि दूध बिक्रीका लागि बजार खोज्दै भौतारिनुपर्ने, हिउँदमा बिक्री नहुने र मिल्क होलिडेको समस्या समाधान भएको बास्कुनाका किसान तिलक गुरुङले बताउनुभयो ।
“बेनीका डेरीले भैसीको दूध मात्र बिक्री गर्दा गाईपालन गरेका कृषक दूधले बजार नपाउँदा समस्यामा परेका थियौ । जातीय विभेदका कारण दलितले उत्पादन गरेको दूधले बजार पाएको थिएन्,” उहाँले भन्नुभयो “पातलो हुने भएकाले बेनीमा गाईको दूधको खपत कम छ । संकलन केन्द्र मार्फत गाईभैसी र सबै समुदायका किसानले उत्पादन गरेको दूधको बजार सुनिश्चितता भएको छ ।”
सोमबारदेखि शुरु भएको संकलन केन्द्रमा हाल २० जना कृषकले दैनिक पाँच सय लिटर दूध ल्याएका छन् । पोखरामा रहेको सुजल डेरी उद्योगले सिंगामा उत्पादन भएको दूध खपत गर्ने सम्झौता गरेको छ । दूधको गुणस्तर अनुसार मूल्य दिने र दैनिक दश हजार लिटर सम्म दूध खरिद गर्ने उद्योगले सहमति गरेको बेनी नगरपालिका–४ का वडा अध्यक्ष अणबहादुर खड्का (भगवान) ले बताउनुभयो ।
“पहिलो चरणमा उद्योगको ट्याङ्कर दुई दिनमा एक पटक सिंगा आएर दूध दुवानी गरेर पोखरा लैजान्छ,” उहाँले भन्नुभयो “उत्पादन बढाएर दैनिक रुपमा पोखरा दूध पठाउने योजना छ ।” सहकारीले किसानहरुले उत्पादन गरेको दूध संकलन र सुरक्षित भण्डारण गर्ने व्यवस्था मिलाएको छ । दूधको गुणस्तर अनुसार मूल्य पाउनेछन् ।
सिंगाको शुभकामना कृषि सहकारी संस्थाले बेनीमा ल्याउने बाहेक थप दूध उत्पादन गरेर पोखरा पठाउन गाईपालन गर्न थालेका छन् । शुभकामना सहकारी मार्फत वार्षिक रु. एक करोड मूल्य बराबरको दूध बिक्री हुने गरेको छ ।
हाल बेनीमा भैसीको दूध खपत हुने गरेको छ । बेनीमा खपत नहुने दूधलाई पनि पोखरामा खपत गराउन सकिने भएको छ । दूधको बजार सुनिश्चित भएपछि सिंगामा दूध उत्पादन मार्फत आयआर्जन र रोजगारीको अवसर सिर्जना गर्ने वातावरण बनाउन सहयोग पुगेको छ ।
