पोखरेबगर, । माध्यमिक शिक्षा परिक्षा (एसइई)मा उत्कृष्ट अंक ल्याउने विद्यार्थीहरुलाई म्याग्दीको अन्नपूर्ण गाउँपालिकाले मंगलबार नगद सहित पुरस्कृत गरेको छ ।
गाउँपालिकाको केन्द्र पोखरेबगरमा २०८१ को एसईईमा ३.६० देखि माथि जिपिए ल्याएर उत्तीर्ण हुने तीनजना विद्यार्थीलाई जनही रु. २४ हजार नगद र प्रमाणपत्रले सम्मान गरिएको हो ।
वडा नम्बर ६ घार स्थित मुक्तिमार्ग माविबाट एसइईमा सहभागी ललिता खड्काले ३.८० जिपिए, वडा नम्बर १ को कैलाश मावि दोबाकी युना राम्जालीले ३.७१ जिपिए र सुजता राम्जालीले ३.६५ जिपिए ल्याएका अन्नपूर्णका शिक्षा अधिकृत गणेशबहादुर कटुवालले बताउनुभयो ।
गाउँपालिकाले बनाएको कार्यविधि अनुसार उत्कृष्ट अंक ल्याएर उत्तीर्ण हुने विद्यार्थी छनौंट गरी सम्मान गरिएको उहाँले बताउनुभयो । गाउँपालिकाका अध्यक्ष भारतकुमार पुन, उपाध्यक्ष दिवाकुमारी तिलिजा पुन र प्रमुख प्रशासकीय अधिकृत रामप्रसाद शर्मा कँडेल, गाउँ कार्यपालिकाको सामाजिक विकास संयोजक तथा वडा नम्बर २ का वडाध्यक्ष ओमप्रसाद फगामी लगायतले उत्कृष्ट जिपिए ल्याउने विद्यार्थीहरुलाई नगद सहित सम्मान गर्नुभएको थियो ।
गाउँपालिका अध्यक्ष भारतकुमार पुनले विद्यार्थीलाई हौसला प्रदान गर्न गाउँपालिकाले विगत दुईवर्ष देखि एसइईमा सहभागी भएर उत्कृष्ट जिपिए ल्याउने विद्यार्थीलाई नगद सहित सम्मान गर्ने गरिएको बताउनुभयो ।
आगामी आर्थिक वर्ष देखि एसइई परीक्षा उत्तीर्ण गरी गाउँपालिकाकै विद्यालयहरुमा कक्षा ११ मा भर्ना हुने विद्यार्थीहरुलाई नगद रु. १० हजार र प्राविधिक धारतर्फ भर्ना हुने विद्यार्थीहरुलाई नगद रु. १५ हजार छात्रवृत्ती प्रदान गर्ने कार्यक्रम राखिएको अध्यक्ष पुनले बताउनुभयो ।
यसैगरी प्रदेश र राष्ट्रिय स्तरको राष्ट्रपति रनिङ शिल्ड प्रतियोगितामा सहभागी भएर उत्कृष्ट खेल प्रदर्शन गरेर पदक प्राप्त गर्ने पाँचजना खेलाडीहरुलाई पनि नगद सहित गाउँपालिकाले सम्मान गरेको शिक्षा अधिकृत कटुवालले जानकारी दिनुभयो ।
उहाँका अनुसार मुक्तिमार्ग मावि घारमा अध्ययनरत उसुका खेलाडीहरु आनन्द बरुवाल, सलिना बरुवाल, विशाल बरुवाल, प्रकृति खड्का र बेबिका बरुवाललाई क्रमशः नगद १० हजार, पाँच हजार र तीन हजारका दरले पुरस्कार र प्रमाणपत्रले सम्मान गरिएको छ ।
गाउँपालिकाबाट यसवर्ष एकसय २८ जना एसइईमा सहभागी भएकोमा ९२ जना उत्तीर्ण भएको शिक्षा शाखा संयोजक कटुवालले बताउनुभयो । उहाँका अनुसार प्राविधिक धार तर्फ प्रभा मावि नारच्याङका शत प्रतिशत विद्यार्थी उत्तीर्ण भएका छन् ।
