गणेश गुरुङ (सुरेन)
नारच्याङ, ः नेपालको पर्वतारोहण पर्यटनको इतिहास जोडिएको म्याग्दीस्थित अन्नपूर्ण प्रथम हिमाल आरोहण भएको ७५ वर्ष पूरा भएको अवसरमा हिरक महोत्सव शुरु भएको हो ।
आठ हजार ९१ मिटर अग्लो अन्नपूर्ण हिमाल अवस्थित म्याग्दीको अन्नपूर्ण गाउँपालिका–४ नारच्याङ देखि आधार शिविरसम्मको पदयात्रा टोलीलाई शनिबार साँझ पदमार्गको प्रवेशबिन्दु नारच्याङ बेशीमा स्वागत गरेर महोत्सव शुभारम्भ गरिएको हो ।
आइतबारदेखि शुरु हुने पदयात्रा टोलीमा सहभागि हुन आएका अन्नपूर्णका प्रथम आरोही मौरिस हर्जोग छोरा फ्रान्सका माथिएस हर्जोग लगायत १४ जना विदेशी, पर्यटन ब्यवसायी, पत्रकारको टोलीलाई अन्नपूर्ण गाउँपालिका, ४ नं. वडा कार्यालय, अन्नपूर्ण, जनजागरण युवा क्लव र सिर्जनशिल आमा समूहले स्वागत गरेका थिए ।
माथिएस हर्गोजसँग आउनुभएका फ्रान्सका कलाकारहरुले प्रथम आरोहीको सम्मानमा संगित प्रस्तुत गर्नुभएको थियो । उहाँहरुले जेठ १९ गते साँझ अन्नपूर्ण आधार शिविरमा पनि सागितिक प्रस्तुति गर्ने कार्यक्रम छ ।
प्रथम आरोही मौरिसका छोरा माथिएस, नाती इथेन हर्जोग लगायत फ्रान्सका छ, बेलायतका तीन, भारतका पाँच र इटलीका एक जना पाहुना नेपाल सरकारको निमन्त्रणामा हिरक जयन्तीको कार्यक्रममा सहभागी हुन आउनुभएको अन्नपूर्ण गाउँपालिका–४ का वडा अध्यक्ष लोकबहादुर पुनले बताउनुभयो ।
उहाँका अनुसार नारच्याङ वेशी देखि हुमखोला, फुतफुते झरना, साँधीखर्क, भुसकेत, पञ्चकुण्ड ताल हुदै जेठ १९ गते चार हजार एक सय मिटर उचाईमा रहेको अन्नपूर्ण आधार शिविरमा पुग्ने मौरिस हर्गोज पदमार्गको पदयात्रा टोलीमा करिब दुई सय जना सहभागी छन् ।
नेपालको पर्यटन क्षेत्रको विकास र पर्वतारोहणको शुभारम्म भई हिमाललाई विश्वभर चिनाउने दिनको सम्झनामा आगामी जेठ २२ गतेसम्म बिविध कार्यक्रम गरेर हिरक महोत्सव मनाइने अन्नपूर्ण गाउँपालिकाका अध्यक्ष भारतकुमार पुनले जानकारी दिनुभयो ।
“आरोहणको ७५ वर्षपछि पहिलो पटक सम्बन्धीत भूगोलमा महोत्सव मनाउन पाएकोमा हर्षित भएका छौ,” पदयात्रा टोलीलाई स्वागत गर्दै उहाँले भन्नुभयो “हर्गोजको टोलीबाट भएको अन्नपूर्ण आरोहणले नेपालको पर्वतारोहणको सम्भावना अन्तर्राष्ट्रियकरण भएकाले हिरक महोत्सव आयोजना गरिएको हो ।”
यसअघि काठमाडौ र पोखरामा कार्यक्रम गरेर अन्नपूर्ण आरोहण दिवस मनाउने गरिएको थियो । म्याग्दी, कास्की, मनाङ र मुस्ताङ जिल्लाको सिमानामा रहेको आठ हजार ९१ मिटर अग्लो अन्नपूर्ण हिमाल आरोहण गर्ने बाटो र आधार शिविर म्याग्दीको अन्नपूर्ण गाउँपालिका–४ नारच्याङको भूगोलमा पर्छ ।
आठ हजार मिटरभन्दा अग्लो पहिलो मानव पाइला परेका कारण अन्नपूर्णलाई जेठो हिमाल भनिने टे«किङ एजेन्सिज एशोसियसन नेपाल (टान) गण्डकीका अध्यक्ष कृष्णप्रसाद आचार्यले बताउनुभयो । सन् १९५० मा जुन ३ मा फ्रान्सका मौरिज हर्गोज र लुई लचेनलको टोलीले अन्नपूर्णको शिखर चुमेको तीन वर्षपछि विश्वको सर्वोच्च शिखर सगरमाथाको सफल आरोहण भएको थियो ।
महोत्सवको अवसरमा जेठ १९ र २० गते अन्नपूर्ण गाउँपालिकाका ८ वटै वडाको सहभागितामा मगर संस्कृतिमा आधारित पुर्खौली नृत्य, झाँकी तथा खुल्ला नृत्य प्रतियोगिता आयोजना गरिएको छ ।
जुन ३ अथवा जेठ २० गते प्रधानमन्त्री केपी शर्मा ओलीको प्रमुख आतिथ्यतामा आधार शिविरमा राखिएका आरोहीका शालिक अनावरण, संग्रहालय र मौरीस हर्गोज पदमार्गको उद्घाटन, नारच्याङ वेशीमा मुल समारोह, सम्मान तथा पुरस्कार वितरण कार्यक्रम हुने अन्नपूर्ण गाउँपालिकाका उपाध्यक्ष दिवा तिलिजा पुनले बताउनुभयो ।
२० गते हुने आधार शिविर देखि नारच्याङसम्म म्याराथन दौड प्रतियोगितामा म्याग्दीका ४२ जना धावकहरुले नाम दर्ता गराएका छन् । २१ गते पर्यटकीय स्थल घोडेपानी पुनहिलमा पदयात्रा गर्ने कार्यक्रम छ ।
२२ गते पोखरामा प्रथम आरोही हर्जोगले प्रयोग गरेका उपकरण उनका परिवारबाट नेपाल पर्वतारोहण संघद्धारा सञ्चालित अन्तराष्ट्रिय पर्वतीय संग्रहालय पोखरालाई हस्तान्तरण र हर्गोजले लेखेर फ्रान्सेली राजदुतावासले अनुवाद गरेको पुस्तक ‘द अन्नपूर्ण’को विमोचन गर्ने कार्यक्रम तय भएको छ ।
अन्नपूर्ण गाउँपालिका, नेपाल पर्यटन वोर्ड, नेपाल पर्वतारोहण संघ, अन्नपूर्ण संरक्षण क्षेत्र आयोजना (एक्याप)को आयोजना र अन्नपूर्ण गाउँपालिका पर्यटन विकास समिति सहआयोजक भएर महोत्सव गर्न लागिएको हो ।
नारच्याङका तेज गुरुङको अगुवाइमा विसं २०६८ मा अन्नपूर्ण हिमाल र आधार शिविर म्याग्दीमा पर्ने तथ्य तथा पदमार्ग पहिचान भएको थियो । पदमार्गलाई अन्नपूर्ण गाउँपालिकाले ‘मौरिस हर्जोग’ नामकरण गरेको छ ।
पदमार्गको प्रचारप्रसार गर्न प्रवेश विन्दुमा पर्ने नारच्याङमा विसं २०७७ मा गाउँपालिकाले अन्नपूर्ण पर्यटन महोत्सव आयोजना गरेको थियो । कास्की र म्याग्दीका दुई वटा स्थानीय तहको नामकरण अन्नपूर्ण हिमालबाट गरिएको छ । अन्नपूर्ण हिमाललाई फन्को लगाउने अन्नपूर्ण चक्रीय पदमार्ग विश्वको प्रसिद्ध पदमार्ग मानिन्छ ।
