गणेश गुरुङ (सुरेन)
बेनी, ः अन्नपूर्ण हिमाल आरोहणका लागि आरोहीहरु आधार शिविरमा पुग्न थालेका छन् ।
आठ हजार ९१ मिटर अग्लो अन्नपूर्ण हिमाल आरोहण गर्ने आधार शिविर म्याग्दीको अन्नपूर्ण गाउँपालिका–४ नारच्याङको भूगोलमा पर्छ । चालु बसन्तयाममा अन्नपूर्ण हिमाल आरोहणका लागि आएका आरोही, शेर्पा, पथप्रर्दशक, मजदुर र पर्यटकहरुको आधार शिविरमा चहलपहल बढेको अन्नपूर्ण गाउँपालिका–४ का वडा सदस्य श्याम पुर्जाले बताउनुभयो ।
“अन्नपूर्ण आधार शिविरमा आरोहण टोलीले टेन्ट टाँगेर गाउँ जस्तै बनाएका छन्,” उहाँले भन्नुभयो “आरोहण टोलीका साथै आन्तरिक पर्यटकहरुको पनि आधार शिविरमा आगमन शुरु भएको छ ।” समुन्द्रि सतहदेखि चार हजार एक सय मिटर उचाईमा आरोहीका साथै घुमघामका लागि आन्तरिक पर्यटकहरु पनि आउन थालेका छन् ।
पर्यटन विभागले पछिल्लो पटक गत मङलवार सार्वजनिक गरेको तथ्याङ्क अनुसार यस वर्षको बसन्तयाममा अन्नपूर्ण हिमाल आरोहणका लागि पाँच वटा समूहका ३० जना पुरुष र १२ जना महिला आरोहीले अनुमति लिएका छन् । बसन्त यामका लागि हालसम्म पाँच वटा हिमालका लागि ५८ जनाले अनुमति लिएकामा सबैभन्दा बढी अन्नपूर्ण चढ्ने रहेका पर्यटन विभागका निर्देशक आरती न्यौपानेले बताउनुभयो ।
अनुमति लिनेको संख्या पछिल्लो हप्ता थपिएको छ । पायनियर एडभेन्चर, आठ के एक्सपीडेशन, इमेल नेपाल, सेभेन समिट, १४ पिक्स एक्सीडेशन, मकालु एडभेन्चर र बोची बोची पिक्स मार्फत विश्वका विभिन्न देशबाट आएका आरोहीहरु आधार शिविरमा पुगेर तयारी थालेका छन् ।
भारतीय पर्वतारोहीलाई आरोहण गराउन आधार शिविर पुगेका सेभेन समिटका शेर्पा पेम्बा शेर्पाले २० दिनभित्र अन्नपूर्ण आरोहण सकेर सगरमाथा जाने योजना रहेको बताउनुभयो । शेर्पाहरुले आधार शिविर देखि हिमालको चुचुरोतर्फ जाने बाटो बनाउन थालेका छन् । केही दिन आधार शिविरमा विश्राम र तयारी गरेपछि आरोहीहरु हिमाल चढ्न जाने शेर्पाले बताउनुभयो ।
विश्वको दशौ अग्लो अन्नपूर्ण हिमाल आरोहणका लागि बसन्तयाम उपयुक्त मानिन्छ । अन्नपूर्णको अहिले सम्म चार सय ८८ जनाले सफल आरोहण गरेका छन् । वि.स. १९५० मा फ्रान्सका मौरिस हर्गोजले अन्नपूर्ण पहिलो पटक आरोहण गर्नुभएको थियो । मौरिसले अन्नपूर्ण चढेको तीन वर्षपछि १९५३ मा सर एडमण्ड हिलारी र तेन्जिन नोर्गे शेर्पाले सर्वोच्च शिखर सगरमाथा आरोहण गर्नुभएको थियो ।
आठ हजार मिटर भन्दा अग्लो सबैभन्दा पहिलो पटक मानव पाइला परेका कारण अन्नपूर्णलाई ‘जेठो’ भन्ने गरिन्छ । प्रथम आरोही मौरिस हर्जोगले आरोहणका क्रममा प्रयोग गरेको बाटोलाई पहिचान गरेर नारच्याङ–आधार शिविर जोड्ने मौरिस हर्जोग पदमार्ग तयार भएको छ । नारच्याङका अगुवा तेज गुरुङको अगुवाईमा वि.स. २०६७ मा पहिचान भएको यो पदमार्गमा आधारभूत पूर्वाधार तयार भएपछि आन्तरिक पर्यटकको रोजाईमा परेको छ । पदमार्गलाई ब्यवस्थित बनाएपछि यसपाली मजदुरहरुले सामान बोकेर आधार शिविरमा पु¥याएका अभियन्ता गुरुङले बताउनुभयो ।
“गत वर्षसम्म सामान र पर्यटक दुवै हेलिकप्टरबाट आधार शिविर जाने गर्दथे,” उहाँले भन्नुभयो “यसपाली पर्यटक हेलिकप्टरमा गएपनि सामान भरियाले बोकेर लगेका छन् ।” पदमार्गको प्रयोगसँगै आरोहीहरुको खर्च घट्नुका साथै भरियाहरुका लागि रोजगारीको अवसर सिर्जना भएको छ ।
यसैगरी पदमार्ग र आधार शिविर क्षेत्रमा अस्थायी संरचना ‘टेन्ट’को आश्रय स्थल निर्माण गरि खाना र खाजा खुवाउने ब्यवस्था मिलाएपछि पर्यटकहरुलाई सहज भएको छ । होटल तथा लजको सुविधा नभएको मौरिस हर्जोग पदमार्ग र अन्नपूर्ण आरोहण शिविरमा जानेहरुले खाना, खाजाका परिकार, भाडाकुडा, ग्याँस, लत्ताकपडाको आफै जोहो गर्नुपर्ने समस्या थियो ।
फुटफुते झरनामा चिया पसल, साधीखर्क, गुफाँफाँट, भुसकेट र अन्नपूर्ण आधार शिविरको पञ्चकुण्ड ताल परिसरमा क्यापीङ सञ्चालन गरिएपछि पर्यटकहरुलाई खान, बस्न सहज, बन्दोबस्तीका सामानको भारी बोकेर यात्रा गर्नुपर्ने बाध्यता हट्नुका साथै स्थानीय स्तरमा रोजगारी र आयआर्जनको अवसर सिर्जना भएको छ ।
ती क्यापीङ साइटहरुमा दैनिक ५० जना सम्म पर्यटक बास बस्न सक्छन् । अन्नपूर्ण संरक्षण क्षेत्र आयोजना (एक्याप)मा पर्ने उक्त क्षेत्रमा स्थायी संरचना बनाउन नमिल्ने कानुनी व्यवस्था भएकाले पर्यटक याममा सञ्चालन गर्न मिल्ने क्याम्पीङ क्षेत्र बनाइएको हो । क्याम्पीङ र रेष्टुरेन्टको सुविधाले सहज भएपनि स्वभाविक शूल्क निर्धारण र एकरुपता कायम गर्नुपर्ने पर्यटकहरुले बताएका छन् ।
मिस्त्रीखोलाको किनारै किनार, अग्ला झरना, मनमोहक हिमशृङ्खला, अनौठो भूगोल, पहाड, दुर्लभ वनस्पति, वन्यजन्तुको अवलोकन गर्दै समुन्द्रि सतहदेखि चार हजार एक सय मिटर उचाइमा रहेको अन्नपूर्ण आधार शिविरमा पुग्न सकिन्छ । नारच्याङ देखि दुई घण्टा गाडीमा यात्रा गरेपछि पुगिने हुमखोला देखि दुई दिनमा आधार शिविर पुग्न र तेस्रो दिन फर्कन सकिन्छ ।
छोटो यात्रामा पुग्न सकिने भएकाले अन्नपूर्ण आधार शिविर पर्यटकको रोजाईमा परेको छ । शान्त र एकान्त वातावरण, वन्यजन्तु, पंक्षी, जंगल, अग्ला पहाडको खोच, फुतफुते झरना, अन्नपूर्ण हिमालको फेदीमा रहेको निलो रङगको पञ्चकुण्ड ताल आधार शिविरको आकर्षण हो ।
