बेनी । पश्चिम नेपाल बचत तथा ऋण सहकारी संस्था लिमिटेडको सोमबार १८ औ स्थापना दिवस मनाइएको छ ।
स्थापना दिवसको अवसरमा सहकारीले बेनी नगरपालिका–४ सिंगाको धवलागिरी माविमा सञ्चालित सुस्त श्रवण स्रोत कक्षाका विद्यार्थीहरुलाई पोशाक र शैक्षिक सामग्री सहयोग गरेको छ ।
सहकारीका अध्यक्ष भिमप्रसाद गौतमको नेतृत्वमा विद्यालयमा पुगेका सञ्चालक र कर्मचारीहरुको टोलीले विद्यालय ब्यवस्थापन समितिका अध्यक्ष समेत रहेका वडा अध्यक्ष अणबहादुर खड्का (भगवान) को उपस्थितिमा पोशाक र शैक्षिक सामग्री सहयोग वितरण गरेका हुन् ।
मालिका गाउँपालिकाको केन्द्र दरवाङमा प्रधान कार्यालय रहेको पश्चिम नेपाल बचत तथा ऋण सहकारी संस्थाको ताकम, बाबियाचौर, दरवाङ, तातोपानी, वारीबेनी, भगवती र पोखरेबगरमा सेवा केन्द्र रहेका छन् ।
चालु आर्थिक वर्षको फागुन महिना सम्ममा छ हजार तीन सय ५१ जनाको रु. १२ करोड २३ लाख ८३ हजार शेयर पुजि रहेको सहकारीले रु. ६८ करोड ५८ लाख ६२ हजार तीन सय ८९ बचत संकलन र रु. ६६ करोड ४९ लाख ७९ हजार पाँच सय ११ लगानी गरेको छ । एक हजार एक सय ३३ जना ऋण सदस्य संख्या रहेको सहकारीको तरलता प्रतिशत २७ दशमलब ७६ प्रतिशत रहेको सूचना अधिकारी मेघराज शर्माले बताउनुभयो ।
२०६४ सालमा दरवाङ बजारमा २७ जनाले १÷१ सय रुपैयाँ सेयरबाट सहकारी शुरु गरेका थिए । समान उद्देश्य भएका सहकारी संस्थालाई गाभ्ने नीति लिएको पश्चिम नेपालले गण्डकी प्रदेशको नमुना सहकारी बनाउने लक्ष्य सहित न्यून आय भएका सदस्यहरुको जिवनस्तर उकास्न दूध तथा मासुजन्य कर्जाको कार्यक्रम सञ्चालन गरेको छ ।
सेयर सदस्यहरुलाई बचत र ऋण लगानी सम्बन्धी सेवाका अलावा विभिन्न सामाजिक कार्यक्रमहरु पनि सञ्चालन गरेको सचिव कृष्ण आचार्यले बताउनुभयो । हाजिरी जवाफ, स्वास्थ्य शिविर, रक्तदान, प्राकृतिक विपद्बाट पिडित सदस्यहरुलाई सहयोग गर्ने गरिएको छ ।
