बेनी, ः ढोरपाटन शिकार आरक्षको गुर्जाघाट र म्याग्दीको धवलागिरी गाउँपालिका–१ गुर्जा जोड्ने पदमार्गमा पर्ने हुचिनखोलामा काठको पुल निर्माण भएको छ ।
धवलागिरी गाउँपालिकाको रु. पाँच लाख अनुदान र उपभोक्ताको रु. ६० हजार बराबरको श्रमदानमा ३२ मिटर लामो पुल र दुई सय मिटर पुलसम्म पुग्ने पदमार्ग निर्माण भएको हो ।
पुल निर्माण भएपछि गुर्जाका बासिन्दा र ढोरपाटन–गुर्जा पदमार्गमा यात्रा गर्ने पर्यटकहरुलाई बर्खा याममा जोखिम मोलेर खोला तर्नुपर्ने समस्या हटेको धवलागिरी गाउँपालिका–१ गुर्जाका वडा सदस्य गुनराम छन्त्यालले जानकारी दिनुभयो ।
“रुघाचौरबाट आउने र हुचिनखोलाको दोभानमा बर्खामा आकस्मिक रुपमा बाढी आउने गर्छ । पुल नहुँदा खोला तर्ने क्रममा बाढीले बगाउने जोखिम थियो,” उहाँले भन्नुभयो “गाउँमा भएको पुराना पुलको लठ्ठा झिकेर राखिएको थियो । सोही लठ्ठा तानेर काठको फल्याक बिछ्याएर स्थानीय प्रबिधीबाट पुल बनाइएको हो ।”
हुचिनखोला हुदै ढोरपाटन शिकार आरक्षको गुर्जाघाट जोड्ने पदमार्ग छ । पर्यटकका साथै स्थानीयबासीहरुले पशुलाई गोठ लैजान, जङ्गलमा च्याउ, टुसा, जडिवुटी सङक्न गर्न जानका लागि हुचिनखोला तर्नुपर्छ ।
