बेनी, म्याग्दीको उच्च पहाडी क्षेत्रका बस्ति र पर्यटकीय स्थलमा शनिबार बेमौसमि हिमपात भएको छ ।
धवलागिरी गाउँपालिका–१ गुर्जा, अन्नपूर्ण गाउँपालिका–६ घोडेपानी, पुनहिल, वडा न.–५ को खोप्रा र वडा नं.–८ को मोहरेडाडामा हिमपात भएको हो । गुर्जा, घोडेपानी, पुनहिल र खोप्रा समुन्द्रि सतहदेखि दुई हजार सात सय मिटर भन्दा बढी उचाईमा छन् ।
बर्षा र हिमपातका कारण चिसो बढेको छ । सर्वसाधारणको घरबाहिरको काम प्रभावित भएको छ । घोडेपानीका बासिन्दा बिरेन गर्बुजा पुनले दिउँसो ३ बजेदेखि साँझ ५ बजेसम्म हिउँ परेको बताउनुभयो । घोडेपानी र वरपरका डाडाहरु सेताम्मे देखिएका छन् ।
समुन्द्रि सतहदेखि तीन हजार छ सय मिटरमा रहेको पर्यटकीय स्थल खोप्रा लेकमा हिउँ जमेको खोप्रा सामुदायिक लजका कर्मचारी आदेश तिलिजा पुनले बताउनुभयो । यो वर्ष खोप्रामा शनिबार तेस्रो पटक हिउँ परेको हो ।
खोप्रा, पुनहिल र मोहरेडाडामा हिउँ परेपछि पर्यटक खुसी भएका छन् । पुष, माघको सिजनमा हिउँ परेको थिएन् । चैत महिनामा बेमौसममा हिउँ परेको घोडेपानीका बासिन्दा मिना पुनले बताउनुभयो ।
म्याग्दीका सबैजसो ठाउँमा बर्षा भएको छ । बर्षाका कारण वनजंगलमा लागेको डढेलो नियन्त्रण भएको छ । बर्षाले जौ, गहुँ, उवा लगायत हिउँदे, बर्खे आलु र मकै बालीलाई सिचाईको काम गरेकाले कृषकलाई राहत मिलेको धवलागिरी गाउँपालिका–१ गुर्जाका वडा सदस्य गुनराम छन्त्यालले बताउनुभयो ।
कृषि ज्ञान केन्द्र म्याग्दीका प्रमुख सञ्जिव बाँस्तोलाले बर्षा र हिउँले खेतबारीमा राखेको मल भिजेर बिरुवाका लागि आवश्यक पर्ने पौष्टिक तत्व आपुर्ति हुने बताउनुभयो । यो बर्षाले हिउँदे र बर्खे दुवै बालीलाई फाइदा पुग्ने उहाँले बताउनुभयो ।
